İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 256 Hüküm no: 219 Orijinal metin no: [26b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çerağî Hamza mahallesinden Yusuf b. Abdullah’ın Ahmed b. Mehmed Çavuş’un evine girerek hizmetçisini öldürüp parasını çalması Vilâyet-i Rumeli’nde Eğriboz sancağında Kızılhisar kasabası sükkânından olup hâlâ mahmiye-i İstanbul’da Çerâğī Hamza mahallesinde sâkin Ahmed Efendi b. Mehmed Çavuş mahfil-i kazâda takrîr-i kelâm edip işbu târih-i kitâb günü kuşluk vaktinde menzilimde hizmetkârım Ömer b. Mahmud nâm şâbb-ı emredi bekçi koyup taşra gittiğimde Yusuf nâm kimesne menzilime girip hizmetkârım Ömer’i sol eğeğisi altında bir yerde ve sağ yüzünün üzerinde iki yerde ve sağ bileğisi üstünde bir yerde bıçak ile vurup katleyledikden sonra sepetimi kırıp içinde mevcûd olan eşyâmdan yüz yirmi şerîfî altın ve otuz riyâlî guruş ve kırk esedî guruş ve dört bin hurda akçe ile bir sâde raht ve bir zeytûnî sadef ve iki aynamı ahz etmişdir, hâlâ cânib-i şer‘den maktûl-i mezbûrun üzerine varılıp ba‘de’n-nazar keşf ve müşâhede olunmak matlûbumdur dedikde savb-ı şer‘den Mevlânâ Keşfî Mustafa Efendi irsâl olunup ol dahi zeyl-i rakīmde muharrerü’l-esâmî olan Müslimîn ile mezbûr Ahmed Efendi’nin sâkin olduğu menziline varıp maktûl-i mezbûrun cesedine nazar eyledikde fi’l-vâki‘ mezbûr Ömer’in sol eğeğisi altında bir yerde ve sağ yüzünün [27a] üzerinde iki yerde ve sağ bileği üstünde bir yerde bıçak yarasıyla mecrûhen maktûl olduğunu keşf ve müşâhede ve mahâllinde tahrîr, ba‘dehû ma‘an irsâl olunan Mustafa b. Mehmed ile meclis-i şer‘e gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’l-işrîn min-Şa‘bâni’l-mu‘azzam li-sene isneyn ve seb‘în ve elf Şuhûdü’l-hâl: Mahmud Efendi b. Muharrem el-imâm, Süleyman Efendi b. el-Hâc Hüseyin, Abdülkadir Halîfe b. Hüseyin el-müezzin, Mustafa Çelebi b. Ahmed, Mehmed Çelebi b. Şaban, Mehmed Beşe b. Abdullah, Mustafa b. Mehmed.