İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 262 Hüküm no: 225 Orijinal metin no: [28a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’da Üskübî mahallesinden Belkıs bt. Abdullah’ın Receb b. Halil’den boşanması Mahmiye-i İstanbul’da Üskübî mahallesinde sâkine Belkıs bt. Abdullah tarafından husûs-ı âtîye vekîl olup mezbûrenin zâtını ma‘rifet-i şer‘iye ile ârifân Mehmed Çelebi b. Abdullah ve İbrahim b. Abdullah şehâdetleri ile şer‘an vekâleti sâbite olan Mustafa b. Hasan meclis-i şer‘de müvekkile-i mezbûrenin zevci işbu râfi‘u’l-vesîka Receb b. Halil mahzarında bi’l-vekâle ikrâr u i‘tirâf edip müvekkilem mezbûre zevcim mezbûr Receb zimmetinde mütekarrir ve ma‘kūdün-aleyh olan sekiz yüz akçe mehr-i mü’eccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzere zevcim mezbûr ile muhâla‘a-i sahîha-i şer‘iye ile muhâla‘a edip ol dahi hul‘-ı mezbûru kabûl eyledikden sonra zevciyete ve gayra müte‘allika da‘vâdan her birimiz âharın zimmetini ibrâ ve ıskāt eyledik dedi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin aşer min-Şa‘bâni’l-mu‘azzam li-sene isnâ ve seb‘în ve elf Şuhûdü’l-hâl: Dilaver el-müezzin, Mesud Efendi el-imâm, Hasan Efendi el-imâm, Üstâd Ali b. ( ), Abdi b. Ramazan, Şükrullah b. Mustafa, Abdi Çelebi b. Hüseyin.