İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 262 Hüküm no: 226 Orijinal metin no: [28a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ürgüb kazası Sinason köyünden Totoş v. Luka’nın vergisini ödemesi Vilâyet-i Anadolu’da Ürgüb kazâsına tâbi‘ Sinason nâm karye ahâlîsinden olup karye-i mezbûre re‘âyâsı üzerlerine beher sene lâzım gelen teklîflerini cem‘e me’mûrlar olan İstavri v. Safar ve Totoş v. Doğancı ve İstori v. Toma ve Totoş v. Luka nâm zimmîler meclis-i şer‘de karye-i mezbûre sükkânından Totoş v. Luka muvâcehesinde üzerine her biri takrîr-i da‘vâ edip mezbûr Totoş karye-i mezbûrdan olup hatta elli beş târihinde Muharrir Şerhi Efendi tahrîrinde mezbûr Totoş karye-i mezbûre re‘âyâsından olmağla yine ra‘iyyet kaydolunup işbu seneye gelince üzerine lâzım gelen tekâlîfini bizimle edâ edegelmiş iken işbu senede üzerine lâzım gelen dört yüz akçe harâcını bizimle edâdan imtinâ‘ eder, mezbûrdan suâl olunsun dedikde gıbbe’s-suâl mezbûr Totoş kazıyye bâlâda tafsîli mürûr etdiği vech üzere olduğunu bi-tav‘ihiikrâr u i‘tirâf etmeğin mûcebince ba‘de’l-hükm mâ-vaka‘a bi’t-taleb ketb olundu. Fi’l-yevmi’t-tâsi‘ aşer min-Şa‘bâni’l-mu‘azzam li-sene isneyn ve seb‘în ve elf Şuhûdü’l-hâl: Şükrullah b. Mustafa, Ahmed Efendi b. Hacı İbrahim, Abdi Çelebi b. Hüseyin, Mehmed b. Ramazan.