İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 263 Hüküm no: 227 Orijinal metin no: [28a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sivas’ın Uzunoğlan köyünden Hatar v. Sefer’in vergisini ödemesi Fi’l-asl vilâyet-i Anadolu’da Sivas kazâsına tâbi‘ Uzunoğlan nâm karye sükkânından olup hâlâ mahmiye-i İstanbul’da Sulumanastır mahallesinde sâkin Hatar v. Sefer nâm Ermeni mahfil-i kazâda işbu bâ‘isü’s-sifr Toros v. Avak nâm Ermeni muvâcehesinde üzerine da‘vâ ve takrîr-i kelâm edip mezbûr Toros karye-i mezbûre re‘âyâsından olup üzerine edâsı lâzım gelen harâc ve sâir tekâlîfini bizimle ma‘an edâ ve teslîm edegelmiş iken hâlâ taleb eylediğimde edâdan imtinâ‘ eder, suâl olunup alıverilmek matlûbumdur dedikde gıbbe’s-suâl mezbûr Toros cevâbında yine kazâ-i mezbûra tâbi‘ Andekli nâm karye ahâlîsinden olup karye-i mezbûre re‘âyâsı mahrûse-i Üsküdar’da vâki‘ merhûme Vâlide Sultan Evkāfı’nın perâkende re‘âyâsından olmağın karye-i mezbûre Andekli’nin zâbitlerine üzerime edâsı lâzım gelen harâc ve sâir tekâlîfimi karye-i mezbûre re‘âyâsı ile ma‘an edâ ve teslîm edegelmişdim deyü def‘le mukābele edicek, gıbbe’l-istintâk ve akībe’l-inkâr mezkûr Toros’dan müdde‘âsını mütebeyyin beyyine taleb olundukda mahmiye-i mezbûrede Salmatomruk mahallesinde Avanos v. Marat ve Kırkçeşme sakalarından Sakyas v. Mirek nâm Ermeniler li-ecli’ş-şehâde mahfil-i kazâya hâzırân olup istişhâd olunduklarında fi’l-hakīka mezbûr Toros kazâ-i mezbûra tâbi‘ mezkûr Andekli re‘âyâsının perâkendesinden olup vakf-ı mezbûr zâbitlerine üzerine lâzım gelen harâc ve sâir tekâlîfini edâ ve teslîm edegelmişdir, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde şehâdetleri makbûle olmağın müdde‘i-i mezbûr Hatar bî-vech mu‘ârazadan men‘ birle mâ-vaka‘a bi’t-taleb ketb olundu. Fi’s-sâbi‘ aşer min-Şa‘bâni’l-mu‘azzam sene [10]72 Şuhûdü’l-hâl: es-Sâbıkūn Arslan v. Kazer, Kirkor v. Ahtik, Argir v. Marat, Karabet v. Hakar.