İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 268 Hüküm no: 233 Orijinal metin no: [29a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Hasan’ın Karakızzâde Ali Efendi Vakfı’na olan borcunun varisi Ahmed Ağa’dan tahsil edildiği Yemîn. Mahmiye-i İstanbul’da Pirinççi Sinan mahallesinde Karakızzâde Ali Efendi Vakfı’na bi’l-fi‘il mütevellî olan Hüseyin Efendi b. Abdullah meclis-i şer‘-i hatîrde mahalle-i mezbûre sükkânından olup bundan akdem Yenişehir’de vefât eden Hacı Hasan’ın verâseti zevce-i metrûkesi Rahime Hatun’a ve kebîre kızları Âişe ve Havva’ya ve sagīre kızı Emine’ye ve li-ebeveyn kız karındaşı Paşa Hatun’a münhasıra olup kable’l-kısme mezbûre Âişe dahi vefât edip verâseti zevc-i metrûku fahrü’l-akrân Ahmed Ağa b. Hasan’a ve vâlidesi mezbûre Rahime’ye ve kız karındaşı mezbûre Havva’ya münhasıra olduğu şer‘an zâhir oldukdan sonra sagīr-i mezbûr Mehmed’in babası mütevellîsi olup kendi cânibinden asîl ve mezbûretân Havva ve Rahime taraflarından da‘vâ-yı âtiyede husûmet ve redd-i cevâba vekîl olup mezbûretânın zâtlarını ma‘rifet-i şer‘iye ile ârifân olan Halil b. Hasan ve Hüseyin b. Ali şehâdetleri ile şer‘an vekâleti sâbit olup tereke-i müteveffâ-yı mezbûr Hacı Hasan’a vaz‘-ı yedi sâbit olan mezbûr Ahmed Ağa mahzarında bi’t-tevliye üzerine da‘vâ ve takrîr-i kelâm edip mütevellîsi olduğum vakıf malından müteveffâ-yı mezbûr Hacı Hasan hâl-i hayatında yedinden iki yüz bir kıt‘a riyâlî guruş istikrâz ve kabz ve iki senede üzerine devr-i şer‘î ile ilzâm olunan murâbaha-i şer‘iyesinden dahi altmış kıt‘a riyâlî guruş ki cem‘an iki yüz altmış bir riyâlî guruşu zimmetinde deyn oldukdan sonra meblağ-ı mezbûru cânib-i vakf-ı mezbûra kable’l-edâ vefât edip metrûkâtına mûmâ-ileyh Ahmed Ağa vâzı‘u’l-yed olmağın meblağ-ı mezbûru tereke-i vâfiyesinden vakf için alıvermek taleb ederim suâl olunsun dedikde gıbbe’s-suâl ve’l-inkâr mütevellî-i mezbûrdan müdde‘âsını mübeyyin beyyine taleb olundukda udûl-i ahrâr-ı ricâl-i Müslimînden olup mahmiye-i mezbûrede Harat? Kemâl mahallesinin imâmı Seyfullah Efendi b. Osman ve zikrolunan Pirinççi mahallesi sükkânından Kâğıtçı Hasan Çelebi b. Mehmed ve Mustafa Çelebi b. Mehmed nâm kimesneler li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ müteveffâ-yı mezbûr Hacı Hasan hâl-i hayatında bizim huzûrumuzda mal-ı vakf-ı mezbûrdan iki yüz bir kıt‘a riyâlî guruş istikrâz ve kabz ve altmış riyâlî guruş dahi iki senede üzerine ilzâm eylediği murâbaha-i şer‘iyesinden ki cem‘an zimmetinde minvâl-i muharrer üzre cânib-i vakf-ı mezbûra müteveffâ-yı mezkûrun iki yüz altmış bir riyâlî guruş deyni olduğuna şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’iti’’l-kabûl şehâdetleri makbûle olmağın meblağ-ı mezbûru küllen veyâ ba‘zan ahz ü istifâ veyâ taraf-ı şer‘iyeden bir tarîk ile müteveffâ-yı mezbûrun zimmetini ibrâ etmediğine mütevellî-i mezbûra yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm eyledikden sonra mûcebince ba‘de’l-hükm mütevellî-i mezbûr Hüseyin Efendi meclis-i şer‘de mezbûr Ahmed Ağa mahzarında ikrâr edip mal-ı vakf-ı mezbûrdan olup edâsına hükm-i şer‘î lâhık olan iki yüz altmış bir kıt‘a riyâlî guruşu tamamen mezbûr Ahmed Ağa yedinden alıp kabz eyledim min-ba‘d meblağ-ı mezbûrdan bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’r-râbi‘ ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Ramazan Beşe b. Himmet, Mehmed Beşe b. Hüseyin, Mumcu Mehmed Beşe b.( ), Receb b.( ), Hüseyin Efendi b. Ahmed el-kādî, Osman Efendi b. Mustafa.