İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 272 Hüküm no: 240 Orijinal metin no: [29b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa’nın kethudası Mustafa Ağa b. Hüseyin’den bir tüfek alarak sulh olduğu Sulh ve ibrâ. Husûs-ı âti’l-beyânın mahâllinde tahrîri için kıbel-i şer‘den Mevlânâ Keşfî Mustafa Efendi irsâl olunup ol dahi mahmiye-i İstanbul’da Etmeydânı kurbünde Güngörmez mahallesinde sâkin Dergâh-ı âlî kapıcıbaşılarından fahrü’l-emâsil ve’l-a‘yân Ali Ağa b. Abdülmennan’ın menziline varıp zeyl-i rakīmde muharrerü’l-esâmî Müslimîn huzûrunda akd-i meclis-i şer‘ eyledikde müşârün-ileyh Ali Ağa meclis-i ma‘kūd-ı mezbûrda sâbıkā kethudâsı olan Dergâh müteferrikalarından Mustafa Ağa b. Hüseyin mahzarında ikrâr ve takrîr-i kelâm edip mezbûr Mustafa Ağa’ya kethudâm iken eşyâ-i memlûkemden bir samur paçası kürk ve iki sîm raht ve bir sîm Çerkesî raht ve iki sîm gaddâre ve bir sîm kılıç ve bir mâ’î çuka kaplı sırmalı köhne eğer ve bir sagīr nemçe tüfengi ve yetmiş esedî guruş ve bir sîm sâ‘at ve bir çift müsta‘mel çatma yastığı hîbe ve temlîk ve teslîm eylediğinden sonra rücû‘ edip eşyâ-i mezkûremi mezbûr Mustafa Ağa’dan bundan akdem da‘vâ eylediğimde ol dahi ikrâr eyledikden sonra ben sana eşyâ-i mezkûre mukābelesinde yüz eli guruş kıymetli bir arakan? bardak ve üç bin akçe kıymetli bir sîm teber ve bin beş yüz akçe kıymetli bir yeşil canfes ve bin iki yüz akçe kıymetli bir altun yaldızlı at gemini ıvaz vermiş idim deyü ol dahi benden da‘vâ etmekle beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî tavassut-ı muslihîn ile eşyâ-i mezkûre da‘vâsından mezbûr Mustafa Ağa ile beynimizde vasf ve kıymeti ma‘lûm cerhadar? bir tüfeng üzerine sulh oldukda ben dahi sulh-i mezbûru kabûl ve bedel-i sulh olan tüfeng-i mezbûru mezbûr Mustafa Ağa yedinden ahz u kabz eyledim ba‘de’l-yevm husûs-ı mezbûra müte‘allika da‘vâdan târih-i kitâba gelince her birimiz âharın zimmetini ibrâ-i âm ile ibrâ ve ıskāt eyledik dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ve ma‘an irsâ olunan Mustafa b. Mehmed ve Hasan b. Ahmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 24 min-Şa‘bâni’l-mu‘azzam sene [10]73. Şuhûdü’l-hâl: İbrahim Çavuş b. Rıdvan el-mübâşir, Mehmed Ağa b. Abdülkadir, Ali Bey b. Mehmed, Mustafa Ağa b. Ali, Mehmed Bey b. Ahmed, Hasan b. Mehmed, Mustafa Çelebi b. Mehmed, Mehmed Çelebi b. Abdülkadir