İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 274 Hüküm no: 242 Orijinal metin no: [30a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Murad b. Abdullah’la Ahmed Beşe b. Mustafa’nın köle davasında sulh oldukları Sulh. Mahmiye-i Galata’da Azabkapısı mahallesinde sâkin Murad b. Abdullah nâm kimesne meclis-i şer‘de sefîne reislerinden bâ‘isü’l-kitâb Ahmed Beşe b. Mustafa nâm kimesne mahzarında ikrâr ve takrîr-i kelâm edip bundan akdem vilâyet-i Rumeli’nde vâki‘ İsmail Geçidi nâm kasabada mecrûhen fevt olan sulbî oğlum Hüseyin nâm müteveffânın gāib ani’l-meclis gök gözlü açık kaşlı orta boylu sarışın Rusiyyü’l-asl Yusuf nâm abd-i memlûku ile işbu hâzıra bi’l-meclis gök elâ gözlü açık kaşlı orta boylu Rusiyyetü’l-asl Fâtıma nâm câriye-i memlûkesini maraz-ı mevtinde âzad eyleyip mezbûrânın ıtk-nâmelerin tahrîr ve kendülere teslîme mezbûr Ahmed Beşe’yi vasîyy-i muhtâr nasb ve ihtiyâr etmekle ben dahi i‘tâk, mesfûr maraz-ı mevtinde vâki‘ olmağın sülüsden mu‘teberdir deyü hasran vârisim hasebiyle câriye-i mevsûfe-i mezkûrenin sülüsânına vaz‘-ı yed murâd eylediğimde mezbûr Ahmed Beşe’ye câriye-i mezkûrenin mecmû‘ı mu‘taka olmak zu‘miyle tezevvüc etmeğin zevce-i menkûhamdır deyü vech-i muharrer üzre vaz‘-ı yedime mâni‘ olmağın beynimizde münâza‘ât-ı kesîre ve muhâsamât-ı şedîde vâkı‘a olmuş idi el-hâletü hâzihî muslihûn ve Müslimûn vesâteti ile mezbûr Ahmed Beşe da‘vâ-yı mezkûremden benimle üç bin akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûru mezbûr Ahmed Beşe yedinden tamamen ahz u kabz eyledim min-ba‘d mevsûfân-ı mezkûrân Yusuf ve Fâtıma’nın ıtklarına? mübcir oldum benim alâka ve medhalim kalmadı dedikde gıbbe’t-tasdîk mâ-vaka‘a bi’t-taleb ketb olundu. Fi’l-hâmis ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Kurd Beşe b. Mehmed, Mustafa Beşe b. Kurd, Mehmed Çelebi b. Ali Çavuş, Mustafa Çelebi b. Ahmed, Ali b. Hasan, Osman Beşe b. Mehmed, Şükrullah b. Mustafa