İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 279 Hüküm no: 250 Orijinal metin no: [31a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım bt. Çerkes Paşa’nın Cemele karyesindeki menzilini İbrahim Paşa b. Yakub’a sattığı Mübâya‘a. Fi’l-asl vilâyet-i Anadolu’da Erzurum eyâletine tâbi‘ nefs-i Bayburd kasabası sâkinlerinden olup hâlâ Mahmiye-i İstanbul’da Altıay çeşmesi kurbünde sâkine umdetü’l-muhadderâti’l-mükerreme zübdetü’l-muvakkarâti’l-mufahhame Âişe Hanım bt. Çerkes Paşa tarafından vech-i âtî üzre bey‘ ve tefvîz-i semen ve bedele vekîl olup zât-ı mezbûreyi ma‘rifet-i şer‘iye ile ârifân olan Hüseyin Bey b. Hasan ve Osman Bey b. Hasan Çavuş şehâdetleriyle şer‘an vekâleti sâbite olan fahrü’l-akrân Mehmed Ağa b. Hasan meclis-i şer‘-i hatîrde işbu kitâb-ı sedâd intisâbın sahibi olup sâbıkā Trabzon eyâletine mutasarrıf olan emirü’l-ümerâi’l-kirâm zü’l-kadri ve’l-ihtişâm İbrahim Paşa b. Yakub tarafından ikrâr-ı âti’z-zikri tasdîka vekîl olup nehc-i şer‘î ve vech-i mer‘î üzere vekâleti sâbite olan kethudâları fahrü’l-akrân Ömer Ağa b. Derviş mahzarında bi’l-vekâle ikrâr ve takrîr-i kelâm edip müvekkile-i müşârün-ileyhânın akd-i âtî sudûruna dek silk-i mülkünde ve taht-ı tasarrufunda olup kasaba-i mezbûre kazâsı muzâfâtından Cemele nâm karyede vâki‘ lede’l-ahâlî ve’l-cîrân ma‘lûmü’l-hudûd olup dâhiliyesi üç bâb tahtânî beyti ve hâriciyesi selâmlık ta‘bîr olunur bir bâb beyt-i süflîyi ve at ve deve ahurlarını ve samanlık ve anbârı ve mülk harman yeri ve bir ma‘lûmü’l-hudûd su değirmenini ve bahçeyi müştemil çiftlik ta‘bîr olunur mülk menzilini bi-cümleti’t-tevâbi‘ ve’l-levâhık ve kâffetü’l-hukūk ve’l-merâfık vekâletim hasebiyle yüz kıt‘a esedî guruşa paşa-yı müşârün-ileyhe bâtten bey‘ ve ol dahi minvâl-i muharrer üzere iştirâ ve dahi çiftlik-i mezbûr ile tasarruf olunan ma‘lûmü’l-hudûd ve’l-kıt‘a tarlalar ve çayırların hakk-ı tasarruflarını dahi vekâlet-i muhkiyem hasebiyle sahib-i arz izn ve ma‘rifetiyle yüz elli kıt‘a esedî guruşa bedel mukābelesinde paşa-yı müşârün-ileyhe ferâğ ve tefvîz ol dahi minvâl-i muharrer üzere tefevvüz ve kabûl eyledikden sonra semen-i mezbûr ile bedel-i tefvîz-i mezkûr olan cem‘an iki yüz elli esedî guruşu tamamen vekâletim hasebiyle paşa-yı müşârün-ileyhin yedinden alıp kabz edip çiftlik-i mezbûru mahâllinde kabz ve tasarrufa paşa-yı müşârün-ileyhi taslît eyledim keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî ve’l-işrîn min-Şa‘bâni’l-mu‘azzam li-sene isneyn ve seb‘în ve elf. Şuhûdü’l-hâl: Fahrü’l-kuzât Hüseyin Efendi el-kādî sâbıkā Bayburd, Fahrü’l-akrân Mehmed Ağa b. Ali el-cündî, Hasan Bey b. el-cündî an-karye-i Halava, Saraylı Lütfullah Bey b. el-cündî, Fahrü’l-akrân Osman Ağa el-cündî, Ömer Bey b. Mahmud, Muslı Bey b. Ali, Çeşmioğlu Mahmud Ağa, Kaşifzâde Mahmud Ağa, Çarmedli Mehmed Ağa.