İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 285 Hüküm no: 260 Orijinal metin no: [32a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasım Beşe b. Mahmud’un köle davasında İsa b. Himmet’le Mustafa Beşe b. Hasan’ı ibra ettiği İbra. Mahmiye-i İstanbul’da Küçükpazar kurbünde müsâfiren sâkin Kasım Bey b. Mahmud nâm kimesne meclis-i şer‘de el-Hâc İsa b. Himmet ve Mustafa Beşe b. Hasan nâm kimesneler mahzarlarında tav‘an ikrâr ve takrîr [edip] lede’l-asl işbu Şahin b. Abdullah nâm gulâmı târih-i kitâbdan on üç sene mukaddem medîne-i İzmir’de Suluhan’da gāib ani’l-meclis Mustafa Çelebi nâm kimesneden yirmi beş riyâlî guruş ve Gürciyyetü’l-asl memlûke câriyem ile iştirâ ve kabz ve ba‘dehû Bursa’da kāin-atam gāib ani’l-meclis el-Hâc Osman yedine emânet vaz‘ edip bir sene sonra mezbûr firâr eyledikde Akkirman nâm kasabada bulup velâyetim olan Küre-i hadîd kasabasına götürdüğümde kasaba-i mezbûrede kethudâyeri olup mütegallibeden olan Ömer Ağa altı ay mukaddem mezbûru cebr edip aldıkdan sonra gulâm-ı mezbûr merkūmân yedlerinde şirâ ile mazbût olduğu mesmû‘um olmağla hâlâ Bursa’da seccâde-nişîn olan efendi huzûrunda mülküm olduğuna ikāmet-i beyyine edip ba‘de’l-hükm nakl-i şer‘î ile gelip mezbûrândan da‘vâ eylediğimde mezbûrân ol gulâmı mülküm olduğunu inkâr eylediklerinde ibrâz-ı nakl-i şer‘î ile gulâm-ı mezbûru almak sadedinde iken muslihîn tavassutu ile mezbûrân el-Hâc İsa ve Mustafa Beşe gulâm-ı mezbûr da‘vâsından an-inkâr beş bin akçe üzerine benim ile sulh olup ben dahi sulh-i mezbûru kabûl ve bedel-i sulh olan beş bin akçeyi yedlerinden alıp da‘vâ-yı merkūmeden merkūmân el-Hâc İsa ve Mustafa Beşe’yi ibrâ-i âmm-ı kātı‘u’n-nizâ‘la ibrâ ve ıskāt eyledim dedikde gıbbe’t-tasdîk mâ-vaka‘a bi’t-taleb ketb olundu. Fi’r-râbi‘ ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Ahmed Efendi b. Mehmed el-müderris, Hasan Beşe b. Piri, Abdi Beşe b. Şaban, Hüseyin Beşe b. Ramazan, el-Hâc Hasan b. Osman, Mustafa Beşe b. Mehmed, Abdullah b. Abdülmennan, Hüseyin Efendi el-Burûsî.