İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 287 Hüküm no: 262 Orijinal metin no: [32b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Ağa b. Abdullah’ın Gürcü asıllı kölesi Kaytas b. Abdullah’ı azat ettiği Fi’l-asl vilâyet-i Anadolu’da Mısr-ı Kāhire’de vâki‘ Kal‘a-i Sultaniye sükkânından olup hâlâ mahmiye-i İstanbul’da Sultan Mehmed kurbünde sâkin fahrü’l-akrân Mustafa Ağa b. Abdullah nâm kimesne meclis-i şer‘-i hatîr-i lâzımü’t-tevkīrde ikrâr ve takrîr-i kelâm edip bana rıkkını mu‘terif olan orta boylu kumral kaşlı elâ gözlü Gürciyyü’l-asl Kaytas b. Abdullah nâm abd-i memlûkümü hasbeten lillâhi te‘âlâ ve taleben li-merzâti rabbihi’l-a‘lâ tahrîr ve i‘tâk ve silk-i ahrâr-ı asliyyîne idrâc ve ilhâk eyledim ba‘de’l-yevm mezbûr Kaytas sâir ahrâr-ı asliyyîn gibi hür olup üzerinde hakk-ı velâdan gayri hakkım bâkī kalmadı dedikde mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Şa‘bâni’l-mu‘azzam li-sene isneyn ve seb‘în ve elf Şuhûdü’l-hâl: Ahmed Ağa b. Hazinedar, Silâhdâr Halil Ağa, Çukadar Ahned Ağa, Mühürdar Rüstem Ağa, Gulâm-ı miftâh Ahmed, Mehterbaşı el-Hâc Mehmed Ağa, Habib Ağa, Kapıcılar Kethudâsı Musa Ağa ve gayruhum.