İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 288 Hüküm no: 264 Orijinal metin no: [32b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Karabet v. Turuş’un Delot bt. Mihran’dan hisse talebinin reddedildiği Muhâsebeci imzâsıyladır. Mahmiye-i İstanbul’da Seferikoz mahallesinde sâkin iken bundan akdem hâlik olan Karabet v. Turuş nâm Ermeni’nin verâseti zevce-i metrûkesi Saltana bt. Ağya’ya ve vâlidesi Delot bt. Mihran’a münhasıra olduğu şer‘an mütehakkık oldukdan sonra mezbûr Saltana’ya mahfil-i kazâda tereke-i hâlik-i mezbûra vâzı‘atü’l-yed olan mesfûra Delot mahzarında üzerine takrîr ve da‘vâ edip hâlik-i mezbûrun Agop nâm Ermeni zimmetinde cihet-i karzdan bin iki yüz riyâlî guruş ve Ekmekçi Arzuman zimmetinde cihet-i mezbûreden yüz riyâlî guruş Kulaksız Ekmekçi Bogos zimmetinde cihet-i mezbûreden altı yüz riyâlî guruş ve Karataş ve Karayani ve diğer Karayani zimmetlerinde cihet-i mezbûreden altı yüz riyâlî guruş ve diğer Habbâz Arzuman zimmetinde yüz riyâlî guruş ki cem‘an iki bin altı yüz riyâlî guruş hukūku olup kable’l-ahz ve’l-istifâ hâlik olmağla meblağ-ı mezbûr iki bin altı yüz riyâlî guruş zikrolunan medyûnlardan mezkûre Delot cem‘ u tahsîl ve ahz eylediğinden gayri terekesinden dahi beş beledî döşek ve on beledî yorgan ve üç kebîr kazan ve yedi tencere ve üç demir sini ve kırk lengeri ve tepsi ve sahan ve üç bakraç ve on re’s ineğini kabz eylemiş idi bi-hasebi’l-irsi’ş-şer‘î bana isâbet eden rub‘ hissemi vermemişdir suâl olunup bana teslîme mezbûre Delot’a tenbîh olunmak matlûbumdur dedikde gıbbe’s-suâl mezbûre Delot cevâbında zikrolunan medyûnlar zimmetlerinde olan meblağ-ı mezbûr iki bin altı yüz riyâlî guruş kendi mâlım ve eşyâ-i mesfûre mülk-i mahz-ı sahîhim olup hatta mezbûre Karabet helâkinden altı ay mukaddem hâl-i hayatında ve kemâl-i akl ve sıhhatinde meblağ-ı mezbûr ile eşyâ-i merkūme mülk-i mahz-ı sahîhim olduğunu alâ-ruûsü’l-işhâd ikrâr dahi eylemişdir deyü def‘le mukābele edecek gıbbe’l-istintâk ve’l-inkâr mezbûre Delot’dan def‘-i mezbûrunu mübeyyin beyyine taleb olundukda udûl-i Müslimînden olup Ali b. Turhan ve Mehmed Çelebi b. Mehmed Beşe ve Pazarcı Halil Beşe ve el-Hâc Mehmed b. Süleyman ve Sakazâde Mehmed Çelebi b. Sefer ve el-Hâc Mehmed b. el-Hâc Eyüp nâm kimesneler li-ecli’ş-şehâde meclis-i şer‘a hâzırûn olup isre’l-istişhâd fi’l-vâki‘ mezbûre Karabet hâl-i hayatında ve kemâl-i sıhhatinde mezbûr Agop zimmetinde olan bin iki yüz riyâlî guruş Ekmekçi Arzuman zimmetinde olan yüz guruş ve Kulaksız Habbâz Bogos zimmetinde olan altı yüz guruş ve Karataş ve Karayani ve diğer Karayani zimmetlerinde olan altı yüz guruş ve diğer Habbâz Arzuman zimmetinde olan yüz guruş ki cem‘an iki bin altı yüz riyâlî guruş ile eşyâ-i mesfûre vâlidem Delot’un mülk-i mahzı ve hakk-ı sırfı olup vechen mine’l-vücûh ve sebeben mine’l-esbâb benim için hak ve alâka ve medhal yokdur deyü kirâren ve mirâren huzûrumuzda ikrâr ve bizi işhâd edip mezbûre Delot dahi tasdîk eyledi bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle ba‘de’l-hükm mâ-vaka‘a bi’t-taleb ketb olundu. Fi’s-sâlis ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Ahmed Efendi b. Mehmed, Ahmed b. Musa, Mehmed b. Nasuh, Murad b. Abdullah, Mehmed b. Abdullah, Baba Ali b. ( ).