İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 293 Hüküm no: 268 Orijinal metin no: [33b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hatun bt. Ahmed’in mirası olan menzilin İbrahim Ağa’ya satıldığı Mahmiye-i İstanbul’da Zeyrek mahallesinde sâkin iken vefât eden Emine Hatun bt. Ahmed’in verâseti zevc-i metrûku Mustafa Beşe b. Abdullah ve sulbî sagīr oğlu Mehmed ve sulbiye kızı Fâtıma’ya münhasıra olup kable’l-kısme mezbûr Mehmed dahi vefât edip verâseti mezbûr Mustafa Beşe’ye münhasıra olduğu şer‘an zâhir ve mütehakkık oldukdan sonra mezbûr Mehmed Beşe asâleten ve merkūme Fâtıma tarafından husûs-ı âti’z-zikr vekîl olup mezbûrenin zâtını ma‘rifet-i şer‘iye ile ârifân Abdülkadir Efendi b. Ebûbekir ve Salih Çelebi b. Mehmed şehâdetleri ile şer‘an vekâleti sâbite olan zevci Ali b. Murad nâm kimesne vekâleten meclis-i şer‘de işbu râfi‘u’l-kitâb es-Seyyid İbrahim Ağa mahzarında her biri ikrâr ve takrîr-i kelâm edip mahalle-i mezbûrda vâki‘ bir tarafdan Ömer Beşe nâm kimesne mülküne ve bir tarafdan müşteri-i mezbûr es-Seyyid İbrahim Ağa mülküne ve bir tarafdan sedde ve bir tarafdan ba‘zan Âişe Hatun mülkü ve bir tarafdan ba‘zan tarîk-i âmma müntehî bir bâb fevkāni oda ve iki fevkānî tahtadan çatma odaları ve zât-ı eşcâr-ı müsmire cüneyneyi müştemil olup dört sehm i‘tibâr olunan menzilin üç sehm benimdir bir sehmi kızım müvekkile-i mezbûrenin mülk-i mevrûsesi olup ilâ hîn-i sudûr-ı hâze’l-akd müşâ‘iyet üzere mutasarrıflar idik el-hâletü hâzihî menzil-i mezbûru bi-cümleti’t-tevâbi’ ve’l-levâhık ve kâffetü’l-hukūk ve’l-merâfık tarafeynden îcâb ve kabûlü hâvî bey‘-ı bâtt-ı sahîh-i şer‘î ile mûmâ-ileyh İbrahim Ağa’ya râyic fi’l-vakt yirmi üç bin akçeye bey‘ u teslîm ol dahi minvâl-i muharrer üzere iştirâ ve tesellüm ve kabûl eyledikden sonra semeni olan meblağ-ı mezkûr yirmi üç bin akçeyi bi’t-tamam asâleten ve vekâleten mezbûr es-Seyyid İbrahim Ağa yedinden alıp kabz eyledik ba‘de’l-yevm menzil-i mezbûr müşteri-i merkūmun mülküdür bizim alâka ve medhalimiz yokdur dedikde gıbbe’t-tasdîk mâ-vaka‘a bi’t-taleb ketb olundu. Fi’s-sâlis ve’l-ışrûn min-Recebi’l-ferd li-sene isnâ ve seb‘în ve elf. Şuhûdü’l-hâl: Keşfî Mustafa Efendi, Ahmed Efendi b. Mehmed Ağa, Hasan Halîfe b. Mehmed, Hacı Muharrem b. Mehmed, Mehmed Bey b. İbrahim, Halil Çelebi b. Şaban, Ahmed Çelebi b. Abdülkadir.