İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 294 Hüküm no: 270 Orijinal metin no: [33b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha Hatun’daki kuşağın Kahraman bt. Abdullah’a verilerek bedelinin Mehmed Çelebi b. Abdullah’a ödenmesi Hâlâ Dîvân-ı kāimmakām-ı vezâret-i uzmâ ve mesned-nişîn-i vekâlet-i kübrâda akd olunan meclis-i şer‘de medîne-i Üsküdar’da ( ) mahallesinde sâkine Kahraman bt. Abdullah nâm hatun Mehmed Çelebi b. Abdullah mahzarında üzerine da‘vâ ve takrîr-i kelâm edip işbu hazır bi’l-meclis kırk yedi miskāl ve nısf dirhem dokuz paftalı bir ön altun kuşağı târih-i kitâbdan bir ay mukaddem işbu hazır bi’l-meclis Sâliha Hatun’a bi-tarîkı’l-vâye? teslîm ol dahi kabz etmiş idi hâlâ mezkûr kuşağı mezbûr Mehmed Çelebi yedinde buldum suâl olunup bana teslîm olunması matlûbumdur dedikde gıbbe’s-suâl mezbûr Mehmed Çelebi hayatında mârrü’z-zikr kuşağı mezbûr Sâliha Hatun’a işbu hazır bi’l-meclis Kara Halil nâm odabaşıya bey‘ için teslîm edip ol dahi ba‘de’l-kabz mârrü’z-zikr kuşağı bir miskāli üç yüz yirmi üçer akçeye olmak üzere on beş bin üç yüz akçeye târih-i kitâbdan on gün mukaddem bana bey‘ u teslîm ve kabz ve semen-i mezbûr etmiş idi el-hâletü hâzihî mârrü’z-zikr kuşak mezbûr Kahraman nâm hatunun mülkü olduğu ma‘lûmum değildir deyü inkâr edicek müdde‘iyye-i mezbûr Kahraman Hatun müdde‘âsı için beyyine taleb olundukda udûl-i Müslimînden Gazzaz Receb b. Abdülgani ve Medîne-i Münevvere’de ( ) mahalle sâkinlerinden Gömlekli bt. Abdullah ve Alime bt. Hüseyin hatunlar li-ecli’ş-şehâde meclis-i şer‘a hâzırûn olup istişhâd olunduklarında fi’l-vâki‘ işbu hâzırân olan mezbûr kuşak müdde‘iyye-i merkūme Kahraman Hatun’un mülküdür biz bu husûsa şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ri‘âyet-i şerâ’iti’’l-kabûl şehâdetleri makbûle oldukdan sonra müdde‘iyye-i mezbûre Kahraman nâm hatun mârrü’z-zikr kuşağı bey‘ veyâ hîbe ve tarîk-i şer‘iyeden bir tarîk ile mülkünden ihrâc eylemediğine ba‘de’t-tahlîf yemîn billâhi’l-azîm etmeğin ol kuşağı mezbûre Kahraman Hatun’a teslîme mezbûr Mehmed Çelebi’ye tenbîh ve mezbûr Kara Halil Odabaşı semen-i mezbûru kabzı ikrâr etmekle semen-i mezbûr on beş bin üç yüz akçeyi mezbûr Mehmed Çelebi’ye edâ ve teslîme mezbûr Halil Paşa’ya tenbîh olunup mâ hüve’l-vâki‘ bi’t-taleb ketb olundu. Fi’r-râbi‘ ve’l-işrîn min-Recebi’l-ferd li-sene isnâ ve seb‘în ve elf. Şuhûdü’l-hâl: Fahrü’l-akrân Çavuşbaşı, Ali Kethudâ, Mehmed Ağa Mirahur, Ahmed Çelebi b. Mehmed, Süleyman Ağa b. Ali.