İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 295 Hüküm no: 271 Orijinal metin no: [34a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çorbacı b. Durmuş’un verasetinin Mehmed b. İbrahim’e teslimi Samanlık ve harman yeri. Fi’l-asl vilâyet-i Anadolu’da Karahisar kazâsına tâbi‘ Mani nâm karyeden olup Bilye cezîresine muhâfız iken bundan akdem vefât eden Mehmed Çorbacı b. Durmuş nâm kimesnenin verâseti zevcesi Râbia ve sulbiye sagīre kızı Fâtıma’ya ve li-ebeveyn er karındaşı Halil b. Durmuş mahzarında olup kable’l-kısme mezbûr Halil dahi vefât edip verâseti zevce-i metrûkesi Nurcan bt. Hüsameddin ile li-ebeveyn karındaşı oğlu Ali Beşe b. İbrahim’e münhasıra olduğu şer‘an zâhir ve bi-tarîkı’l-münâsahati’ş-şer‘î tashîh-i meseleleri otuz iki sehimden olup sihâm-ı merkūmeden dört sehmi mezbûre Râbia’ya ve on altı sehmi mezbûre Fâtıma’ya ve üç sehmi mezbûre Nurcan’a dokuz sehmi mezbûr Ali Beşe’ye isâbet eylediği müte‘ayyin oldukdan sonra merkūme Nurcan tarafından husûs-ı âti’l-beyânı da‘vâ talebe ve lede’l-iktizâ sulh ve ibrâya ve bedel-i sulhu kabza vekîl olan el-Hâc Mehmed b. el-Hâc İbrahim meclis-i şer‘de müteveffâ-yı mezbûr Mehmed Çorbacı’nın terekesine vâzı‘u’l-yed olup kendi nefsinden asıl ve sagīre-i merkūme Fâtıma’nın tesviye-i umûruna kıbel-i şer‘den mansûbe vasîsi ve vâlidesi mezkûre Râbia tarafından husûs-ı âtîye vekîl olup vekâleti bi-mâ hüve nehci’s-sübût şer‘an sâbite olan mezbûre Râbia’nın zevci işbu râfi‘u’l-kitâb mezbûr Ali Beşe mahzarında takrîr-i kelâm edip müteveffâ-yı mezbûr Mehmed Çorbacı’nın nükūd-ı menkūl ve esâs-ı beyt ve evân-ı sîm ve nühâsiye ve gayr-ı nühâsiye ve bi’l-cümle ism-i mâl ıtlâk olunur cemî‘ terekesinden müvekkilem mezbûre Nurcan’a bi-hükmi’l-münâsahati’ş-şer‘iye isâbet ve intikāl eden üç sehm hisse-i şer‘iyesini merkūm Ali Beşe’den da‘vâ eylediğimde beynimizde münâza‘ât-ı kesîre ve muhâsamât-ı şedîde vukū‘undan sonra vesâtet-i muslihîn ile da‘vâ-yı mezbûreden merkūm Ali Beşe silk-i mülkünde münselik olup yine karye-i merkūmede vâki‘ bir tarafı Abdullah Efendi mülkü ve bir tarafı Abdülgani mülkü ve iki tarafı tarîk-i âm ile mahdûd bir bâb tahtânî oda ve havluyu müştemil mülk menzil ile içinde mevcûd olan iki kebîr tencere ve üç tepsi ve bir leğen ma‘a ibrik ve bir çatma anbâr ve dört kîle tohum ve yüz nakid akçe üzerlerine neclen? inşâ-i akd-i sulh eyledikde ben dahi bi’l-vekâle sulh-i mezbûru kabûl ve bedel-i sulh olan menzil-i mezkûr ile eşyâ-i mezkûreyi mahâllinde ahz u kabz ve teslîme tarafından beni taslît eylediğinden sonra meblağ-ı mezbûr yüz akçeyi teslîme ta‘allül edip suâl olunup teslîme tenbîh olunmak matlûbumdur dedikde gıbbe’s-suâl mezbûr Ali Beşe cevâbında kazıyye bâlâda tafsîli mürûr eylediği vech üzeredir lâkin mezbûre Nurcan tarafından mezbûr el-Hâc Mehmed b. ( ) vech-i meşrûh üzere vekîl etdiği ma‘lûmum değildir isbât-ı vekâlet etmeyince meblağ-ı mezbûru teslîm etmem deyücek mezbûr el-Hâc Mehmed’in vech-i muharrer üzere vekâletini mübeyyin beyyine taleb olundukda udûl-i Müslimînden karye-i merkūme ahâlîsinden olup mezbûr Nurcan Hatun’un zâtını ma‘rifet-i şer‘iye ile ârifân Seydi Efendi el-imâm ve Ali Beşe b. İbrahim li-ecli’ş-şehâde meclis-i şer‘a hâzırân olup isre’l-istişhâd fi’l-vâki‘ mezbûre Nurcan bi-hükmi’l-münâsahati’l-mezkûre kendüye isâbet eden üç sehm hissesini müteveffâ-yı mezbûr el-Hâc Mehmed’i huzûrumda vekîl ve ma‘an yine Fâtıma’nın vasîsi merkūme Râbia ile mezbûr Ali Beşe’den taleb ve da‘vâ ve lede’l-iktizâ sulh ve ibrâ ve bedel-i sulhu kabza mezbûr el-Hâc Mehmed’i nâib nasb ve ta‘yîn ol dahi vekâlet-i mezbûreyi kabûl ve merâsimini edâya ta‘ahhüd eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerine ba‘de’t-tasdîk ve’t-tezkiye şehâdeteri makbûle olmağın mûcebince vekâletine ve meblağ-ı mezbûr yüz akçeye mezbûr el-Hâc Mehmed’e teslîme hüküm olundukdan sonra ve menzil-i mezbûr el-Hâc Mehmed meclis-i şer‘de mezbûr Ali Beşe mahzarında ikrâr edip bâlâda teslîmine hükmolunan meblağ-ı mezbûr yüz akçeyi mezbûr Ali Beşe yedinden tamamen ahz u kabz edip ba‘de’l-yevm hisse-i meşrûha mezbûre Nurcan’ın mürûr-ı müeccelesine ve sâir husûslarına müte‘allika olan cemî‘ da‘âvî ve mutâlebât ve eymân ve muhâsemâtını vekâlet-i mahkiyem hasebiyle mezbûrânı ibrâ-i âm ile ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-şehr-i Recebi’l-ferd li-sene isnâ ve seb‘în ve elf. Şuhûdü’l-hâl: Mustafa Efendi b. Şeyh Mehmed, Ahmed Efendi b. Mahmud, Ahmed Çelebi b. İbrahim, Abdi Çelebi b. Hüseyin, Veli b. Mahmud, Şükrullah b. Mustafa, Ahmed b. Abdülcabbar.