İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 296 Hüküm no: 272 Orijinal metin no: [34a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hamide bt. Mustafa’nın Veli Çelebi b. Yusuf’dan boşanması Mahmiye-i İstanbul’da İbrahim Çavuş mahallesi sâkinelerinden Hamide bt. Mustafa nâm hatun tarafından husûs-ı âti’z-zikre vekîl olup müvekkilem mezbûrenin zâtını ma‘rifet-i şer‘iye ile ârifân olan Mehmed Çelebi b. İbrahim ve Ahmed Çelebi b. Ali şehâdetleriyle şer‘an vekâleti sâbite olan müvekkilem mezbûrenin vâlidesi Âişe bt. Nuh nâm hatun meclis-i şer‘-i hatîr-i lâzımü’t-tevkīrde yine müvekkilem mezbûrenin zevci işbu râfi‘u’l-kitâb Veli Çelebi b. Yusuf nâm kimesne mahzarında bi’l-vekâle üzerine da‘vâ ve takrîr-i kelâm edip müvekkilem mezbûre Âişe’nin mezbûr Veli zevci olup bundan akdem talâk-ı bâyin ile tatlîk eyledikden sonra müvekkilem mezbûreyi tekrar mezbûr Veli tezvîc eylediğinden senin sâkine olduğun menzilinden mezbûre Âişe’yi ihrâc ve âhar menzilde iskân edersem talâk-ı selâse ile benden mutallaka olsun deyü şart ve o şart üzerine kızım mezbûre Ayşe’yi şuhûd mahzarında tezevvüc etmiş iken hâlâ kızım mezbûreyi babası mezbûr Yusuf’un menziline ihrâc etmek murâdımdır suâl olunsun dedikde gıbbe’s-suâl mezbûr Veli Çelebi cevâbında fi’l-vâki‘ müvekkilem mezbûre Âişe zevcim olur talâk-ı bâyin ile tatlîk eyledikden sonra tekrar tecdîd-i akd eyledim deyü ikrâr lâkin şurût-ı mezkûru inkâr edicek müdde‘î-i mezbûrdan müdde‘âsı için beyyine taleb olundukda ityân-ı beyyineden izhâr-ı acz edip istihlâf etmeğin mezbûr Veli Çelebi minvâl-i muharrer üzere şurût eylemediğine teklîf olundukda ityân-ı beyyineden ol dahi alâ-mâ hâze’s-suâl halfü billâhi’l-aliyyü’l-azîm etmeğin müdde‘iyye-i mezbûra mâ-vaka‘a bi’t-taleb ketb olundu. Fi’l-yevmi’l-hâdî ve’l-işrîn min-Recebi’l-ferd Sene [10]73. Şuhûdü’l-hâl: Yakub Efendi b. Şaban el-imâm, İbrahim Halîfe b. Mehmed, el-Hâc Abdi b. Hüsrev, Mustafa, İskender b. Hüseyin.