İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 297 Hüküm no: 273 Orijinal metin no: [34b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rabia ve Kaya bt. Mehmed isimli hatunlar Musa Beşe b. Oruç’tan alacaklarını tahsil ettikleri Mülknâme. Mahmiye-i İstanbul’da Çukur mahallesi sâkinelerinden Râbia ve Kaya bt. Mehmed nâm hatunlar tarafından tefvîz-i âti’l-beyâna vekîl olup mezbûrânın zâtını ma‘rifet-i şer‘iye ile ârifân el-Hâc Mehmed b. el-Hâc Kaya ve Ahmed Beşe b. Yakub şehâdetleri ile şer‘an vekâleti sâbite olan İbrahim b. Abdullah meclis-i şer‘de işbu râfi‘atü’l-kitâb Musa Beşe b. Oruç nâm kimesne mahzarında bi’l-vekâle ikrâr ve takrîr-i kelâm edip mahalle-i mezbûrda Seferikoz mahallesinin avârızı için mevkūf olup yine mahalle-i mezbûrda vâki‘ icâre-i mu‘accele ve senede iki yüz akçe ücret-i müeccele ile müvekkilelerim mezbûretân Râbia ve Kaya’nın tasarruflarında olup bir tarafdan Hasan Efendi odalarına ve bir tarafdan el-Hâc Ali’nin avârız-hânesine mevkūf menzile ve bir tarafkdan tarîk-i hâssa müntehî üç bâb fevkānî oda ve bir sofa ve iki bâb tahtânî oda ve bir bi’r-i mâ-yı müştemil olan menzilin hakk-ı tasarrufunu izn-i mütevellî ile mezbûr Musa Beşe’ye vekâlet-i mahkiyem hasebiyle yirmi beş bin akçe bedel mukābelesinde ferâğ ve tefvîz ol dahi minvâl-i muharrer üzere tefevvüz ve kabûl eyledikden sonra bedel-i tefvîz-i mezkûr olan meblağ-ı merkūm yirmi beş bin akçeyi tamamen vekâletim hasebiyle mezbûr Musa Beşe’nin yedinden alıp kabz eyledim min-ba‘d menzil-i mezbûrda müvekkilelerim mezbûretânın alâka ve medhali kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Şuhûdü’l-hâl: el-Hâc Mehmed b. Ahmed, İbrahim Beşe b. Ali el-imâm, Keşfî Mustafa Efendi, Mehmed Efendi b. Abdülkadir, Şükrullah b. Mustafa, Veli b. Mahmud .