İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 298 Hüküm no: 274 Orijinal metin no: [34b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Çelebi b. Ahmed’in Rus asıllı kölesi Yusf b. Hamidullah’ı azat ettiği Itk-nâme. İşbu uzun boylu çatık kaşlı gök elâ gözlü Rusiyyü’l-asl râfi‘u’l-kitâb Yusuf b. Hamidullah meclis-i şer‘de mezkûrun mevlâsı olup bundan akdem mahmiye-i İstanbul’da Ali Paşa-yı Atîk mahallesinde vefât eden Ömer Çelebi b. el-Hâc Ahmed’in hasran vârisleri olan zevce-i metrûkesi Fâtıma bt. Abdullah ile vâlidesi Emine Hatun taraflarından husûmet ve redd-i cevâba vekîl olup mezbûretânın zâtlarını ma‘rifet-i şer‘iye ile ârifân Ahmed Efendi b. Yusuf ve İbrahim b. Süleyman şehâdetleri ile şer‘an vekâleti sâbite olan Osman b. Murtaza mahzarında üzerine da‘vâ edip beni müteveffâ-yı mezbûr Ömer Çelebi’nin abd-i memlûku olup beni hâl-i hayatında vefâtından bir buçuk sene mukaddem hasbeten lillâh i‘tâk ve tahrîr edip hür olmuş iken ba‘de vefâtihî vârisleri müvekkiletân-ı mezbûretân rıkk olmak üzere bana vaz‘-ı yed ederler suâl olunup sebîlim tahliye olunmak matlûbumdur dedikde gıbbe’s-suâl ve’l-inkâr ve akībe’l-işhâd müdde‘î-i mezbûrdan müdde‘âsını mübeyyin beyyine taleb olundukda udûl-i ricâl-i Müslimînden olup isre’l-işhâd mahalle-i mezbûrda sâkin fahrü’l-kuzât İbrahim Efendi b. Hüsameddin ve fahrü’l-eimme Ahmed Efendi b. Yusuf nâm kimesneler li-ecli’ş-şehâde meclis-i şer‘a hâzırân olup isre’l-ishâd fi’l-vâki‘ müdde‘î-i mezbûr Yusuf mevlânâ-yı müteveffâ-yı mezbûr Ömer Çelebi hayatında vefâtından bir buçuk sene mukaddem bizim huzûrumuzda hasbeten lillâh i‘tâk ve tahrîr eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince mezbûr Yusuf’un ıtkına hükm-birle mâ-vaka‘a bi’t-taleb ketb olundu. Fi’l-hâdî ve’l-işrîn min-Recebi’l-ferd li-sene isnâ ve seb‘în ve elf. Şuhûdü’l-hâl: es-Seyyid Mustafa Efendi b. Ali Efendi, Mehmed Çelebi b. Hasan, İbrahim b. Süleyman, Ömer Çelebi b. el-müezzin, el-Hâc Ahmed b. Mahmud, es-sâbıkūn.