İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 299 Hüküm no: 276 Orijinal metin no: [34b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şaban Ağa b. Mehmed’in verasetinden kızı Ayşe Hatun’a düşen hissenin Hafife bt. Kenan’dan tahsil edildiği Mahmiye-i İstanbul’da Mollagürânî mahallesinde sâkine iken bundan akdem vefât eden Şaban Ağa b. Mehmed’in verâseti zevce-i metrûkesi Hafife bt. Kenan nâm hatun ile sulbî oğlu Mehmed ve sulbiye kızı Âişe nâm hatuna münhasıra olup ba‘de’l-kısme mezbûr Mehmed dahi vefât edip verâseti vâlidesi mezbûr Hafife ile li-ebeveyn kız karındaşı mezbûr Âişe Hatun’a ve li-üm er karındaşı Ahmed Çelebi b. Mustafa’ya ve li-ebeveyn ammisi Ömer Çelebi nâm kimesneye münhasıra olduğu şer‘an zâhir ve mütehakkık oldukdan sonra mezbûr Âişe tarafından husûs-ı âti’l-beyânı ikrâra vekîl olup mezbûrenin zâtını ma‘rifet-i şer‘iye ile ârifân olan Halil Efendi b. Hüsameddin, Abdurrahman Efendi b. Mustafa şehâdetleriyle şer‘an vekâleti sâbite olan mezkûr Ahmed Çelebi meclis-i şer‘de mezbûre Âişe Hatun’un tesviye-i umûruna mukaddemâ kıbel-i şer‘den mansûbe vasîsi ve vâlidesi işbu bâ‘isetü’l-vesîka Hafîfe Hatun tarafından husûs-ı âti’z-zikri tasdîka vekîl olup şâhidân-ı mezbûrân şehâdetleri mezbûre Âişe’nin babası müteveffâ-yı mezbûr[dan] ber-mûceb-i defter-i kassâm kendüye isâbet eden seksen bin dört yüz kırk sekiz akçe hisse-i şer‘iyesini ve karındaşı müteveffâ-yı mezbûr Mehmed’e isâbet eden hisse-i şer‘iyesi olan seksen bin dört yüz kırk sekiz akçeyi ve defter-i kassâmdan hâric on dokuz bin yüz dört akçe ki cem‘an yüz seksen bin fıddî râyic fi’l-vakt akçeyi vesâyeti hasebiyle kabz etmiş idi hâlâ müvekkilem mezbûre Âişe Hatun bâliğa ve reşîde olmağla meblağ-ı mezbûr seksen bin akçemi mezbûr Hafife Hatun yedinden tamamen ahz u kabz eyledim min-ba‘d vasîyy-i mezbûr yedinde müvekkilem mezbûrenin bir akçe ve bir habbe hakkı kalmadı dedikde gıbbe’t-tasdîk mâ-vaka‘a ketb olundu. Fî-yevmi’r-râbi‘ ve’l-işrîn min-Recebi’l-ferd sene 1073. Şuhûdü’l-hâl: Abdurrahman Efendi b. Halil, Osman b. Mehmed, el-Hâc Ahmed, Hüseyin Çelebi b. Yusuf, Ahmed Efendi b. Muharrem, Mahmud Efendi b. Abdülkadir, Ahmed Efendi b. Mehmed, fahrü’l-hurûf Mehmed.