İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 300 Hüküm no: 277 Orijinal metin no: [35a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rahime bt. Ahmed’in alacak davasında İbrahim b. Abdülgani ve Emetullah bt. Fazlı ile sulh oldukları İbra. Mahmiye-i İstanbul’da Aksaray kurbünde Camcılar mahallesinde sâkine Rahime bt. Ahmed nâm hatun meclis-i şer‘de İbrahim Çavuş b. Abdülgani ile Emetullah bt. Fazlı mahzarlarında ikrâr ve i‘tirâf edip mezbûrân mûrisem müteveffâ-yı merkūme Hamide bt. İshak Efendi nâm hatunun kırk bin akçe kıymet-i şer‘iyeli eşyâsını kabz etmekle bana intikāl eden yirmi bin akçelik eşyâyı mezbûrândan da‘vâ onlar dahi inkâr edip ben dahi ikāmet-i beyyineden âciz olup mezbûrâna yemîn vermek sadedinde iken tavassut-ı muslihîn ile mezbûrân benimle üç bin beş yüz akçe üzerine sulh olup ben dahi sulh-i mezbûru kabûl ve bedel-i sulh olan üç bin beş yüz akçeyi yedinden alıp kabz edip mâ‘adâ da‘vâsından mezbûrânın zimmetlerini ibrâ ve ıskāt eyledim dedikde gıbbe’t-tasdîkı’l-mu‘teber mâ-vaka‘a bi’t-taleb ketb olundu. Fi’s-sâbi‘ ve’l-işrîn min-Şa‘bân li-sene isnâ ve seb‘în ve elf. Şuhûdü’l-hâl: es-Seyyid Mehmed b. Ali, Mustafa b. Şaban, Ali b. İbrahim, Ahmed b. Veli, Halil b. İbrahim, Nurullah b. Mustafa.