İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 300 Hüküm no: 278 Orijinal metin no: [35a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ali’nin Mehmed Çelebi b. Ahmed’e borcunu ikrar ettiği Yemîn. Mahmiye-i İstanbul’da Derviş Ali mahallesinde sâkin işbu bâ‘isü’l-vesîka Mehmed Çelebi b. Ahmed mahfil-i kazâda Ahmed b. Ali nâm kimesne mahzarında üzerine da‘vâ ve takrîr-i kelâm edip târih-i kitâbdan üç sene mukaddem mezbûr Ahmed’e mâlımdan altmış esedî guruş ikrâz ve teslîm edip ol dahi iktirâz ve kabz edip mesârifine sarfla zimmetinde hakkım oldukdan sonra meblağ-ı mezbûrdan zimmetinde deyni olup hatta huzûr-ı Müslimînde ikrâr dahi etmiş iken hâlâ edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezkûr Ahmed cevâbında fi’l-hakīka müdde‘î-i mezbûra vech-i muharrer üzere altmış guruş deynim vardır deyü ikrâr etmiş idim lâkin kâziben ikrâr eyledim deyücek fi’l-vâki‘ mezbûr Ahmed’in eylediği ikrârında kâzib olmayıp ve da‘vâ-yı meşrûhiyesinde mubtıl olmadığına müdde‘î-i mezbûr Mehmed Çelebi’ye yemîn teklîf olundukda ol dahi alâ-vefki’l-mesûl yemîn billâhi te‘âlâ etmeğin mûcebiyle ba‘de’l-hükm mâ-vaka‘a bi’t-taleb ketb olundu. Fi’l-yevmi’t-tâsi‘ ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Murtaza Efendi b. Ali, Mustafa Çavuş b. Mehmed, Şaban Beşe b. Osman, Hasan Bey b. Ahmed, Mahmud b. Hasan, Mehmed b. Ramazan, Ahmed b. Abdülcabbar.