İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 301 Hüküm no: 279 Orijinal metin no: [35a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Ağa b. Oruç’un Abdi Reis b. Ahmed’den alacağını tahsil ettiği Mahmiye-i İstanbul’da Demirhan mahallesinde sâkin işbu râfi‘u’l-kitâb Abdi Reis b. Ahmed nâm kimesne meclis-i şer‘-i hatîrde bi’l-fi‘il mahmiye-i mezbûrede mesned-nişîn-i şerî‘at-ı şerîfe-i garrâ olan a‘lemü’l-ulemâi’l-izâm ekremü’l-mevâliyyi’l-kirâm yenbû‘u’l-fezâil metbû‘i’l-efâzıl Şeyhîzâde Abdurrahman Efendi tarafından husûs-ı âti’z-zikre vekîl olup Mustafa Efendi b. Musa ve Hasan Çelebi b. Halil şehâdetleri ile şer‘an vekâleti sâbite olan Ali Ağa b. Oruç mahzarında ikrâr ve takrîr-i kelâm edip bundan akdem mahalle-i mezbûrede sâkin iken vefât eden İbrahim Efendi b. Yusuf’a bi-tarîkı’s-sermâye yetmiş iki bin akçe deynim olup meblağ-ı mezbûrun bin yedi yüz elli akçesini hayatında emri üzere Yani nâm sarrâfa lenger bahâsından deyni için verip dört bin akçesini dahi vefâtında techîz ve tekfîn ve sâir mesârif-i defni için harc edip zimmetimde bâkī kalan altmış altı bin iki yüz elli akçesini zî-rahm cihetinden hasran vârisesi olan Asiye Hatun bt. Muslı tarafından müteveffâ-yı mezkûrun vâzı‘u’l-yed olanlardan kabz ve düyûnunu edâya vekîl-i şer‘îsi olan Sürûrî Efendi b. Ali müteveffâ-yı mezbûrun müşârün-ileyh efendi hazretlerine olan altı yüz guruş zimmetinden altmış altı bin iki yüz elli akçesi için zimmetimde bâkī kalan meblağ-ı mezbûru edâya bana emretmeğin ben dahi vekîl-i mezbûr Sürûrî Efendi’nin emri üzere altmış altı bin iki yüz elli akçeyi vekîl-i mezbûr Ali Ağa’ya teslîm eyledim suâl olunsun takrîri tahrîr ve sûreti yedime verilmek murâdımdır dedikde gıbbe’s-suâl mezbûr Ali Ağa cevâbında fi’l-vâki‘ meblağ-ı mezbûr altmış altı bin iki yüz elli akçeyi tamamen mezbûr Abdi Reis yedinden müvekkilim için alıp kabz eyledim min-ba‘d meblağ-ı mezbûrdan merkūm Abdi Reis zimmetinde bir akçe ve bir habbe bâkī kalmadı dedikde mâ hüve’l-vâki‘ bi’t-taleb ketb olundu. Fi’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Kassâm Kâtibi Ahmed Efendi, Muslı Efendi b. Musa, Ahmed Efendi b. Hanefî el-kādî, Ahmed Çelebi b. Mahmud, eş-Şeyh İvaz Efendi b. İshak, Osman Çelebi b. el-Hâc Ömer, el-Hâc Zülfikar Reis b. er-reîs, Osman Çelebi b. Ömer, Mustafa Çelebi b. Halil, Muammer b. Cafer.