İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 302 Hüküm no: 280 Orijinal metin no: [35a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Çelebi b. Aydın’ın Bulut v. Toros’dan alacağına Avanis v. Serkis’in kefil olduğu Navluncu tâifesinden hâfızü’l-vesîka Hasan Çelebi b. Aydın meclis-i şer‘de Bulut v. Toros ve Avanis v. Serkis nâm Ermeniler muvâcehelerinde üzerlerine da‘vâ ve takrîr-i kelâm edip târih-i kitâbdan iki ay mukaddem mezbûr Bulut her keyli ellişer akçeye benden ve dört yüz altı keyl buğdayımı yirmi bin üç yüz akçeye iştirâ ve kabz edip iki bin akçeyi yedinden ahz eylediğimden sonra mezbûr Avanis meblağ-ı mezbûra kefîl olmuş idi hâlâ mezbûrândan suâl olunsun dedikde gıbbe’s-suâl mezbûr Bulut ber-minvâl-i muharrer mezbûr Hasan Çelebi’ye on sekiz bin üç yüz akçe deyni olduğunu ikrâr lâkin mezbûr Avanis meblağ-ı mezbûra kefâletini inkâr eyledikde müdde‘î-i mezbûrdan müdde‘âsı için beyyine taleb olundukda udûl-i Müslimînden Ali b. Muharrem ve Mustafa b. Mehmed nâm kimesneler meclis-i şer‘a hâzırân olup gıbbe’l-istişhâdi’ş-şer‘î fi’l-vâki‘ mezbûr Avanis merkūm Bulut zimmetinde müdde‘î-i mezbûrun on sekiz bin üç yüz akçe buğday semenine huzûrumuzda kefîl oldu biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de ri‘âyet-i şerâ’iti’’l-kabûl şehâdetleri makbûle olmağın Bulut kefâlet-i merkūmeye ba‘de’l-hükm müdde‘î-i mezbûr muhayyer olmağla meblağ-ı mezbûru ikisinden birinden taleb ve ahza mezbûra tenbîh olunup mâ-vaka‘a bi’t-taleb ketb olundu. Fî-gurreti Ramazani’l-mübârek li-sene isnâ ve seb‘în ve elf. Şuhûdü’l-hâl: Hüseyin Efendi b. el-Burûsî, Mehmed Çelebi el-imâm, Veli Beşe b. Yunus, Sarrâc Mehmed Çelebi b. Üveys, Mustafa Çelebi b. Mahmud.