İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 303 Hüküm no: 282 Orijinal metin no: [35b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Şaban’ın menzilini Mehmed Ağa b. Muslihiddin’e sattığı Mülk-nâme. Mahmiye-i İstanbul’da Kadırgalimanı kurbünde sâkin Ahmed b. Şaban nâm kimesne mahfil-i kazâda Dergâh-ı âlî yeniçerilerinin kethudâ beyi olan umdetü’l-emâcid ve’l-ekârim câmi‘ü’l-mehâmid ve’l-mekârim işbu kitâb-ı sıhhat-nisâbın mâliki Mehmed Ağa b. Muslihiddin tarafından husûs-ı âti’l- beyânı tasdîke sâbitü’l-vekâle vekîli olan mefhari kuzâtü’l-İslâm Gümüşzâde demekle şehîr Yahya Efendi b. Mehmed mahzarında ikrâr ve takrîr-i kelâm edip silk-i mülk-i sahîhimde münselik olup mahmiye-i mezbûrede Şehzâde Sultan Mehmed Han Câmi‘-i şerîfi kurbünde Hoşkadem mahallesinde vâki‘ iki tarafı müşârün-ileyh Mehmed Ağa mülkü ve bir tarafı Fâtıma Hatun mülkü ve bir tarafı tarîk-i hâssa müntehî olup muhavvâta-i hâriciyesi bir bâb fevkānî oda ve bir bâb tahtânî oda ve muhavvâta-i dâhiliyesi iki bâb fevkānî oda ve bir matbah ve bir dehliz ve hamam ve kenîfi ve bir su kuyusunu müştemil menzilimi bi-cümleti’t-tevâbi‘ ve’l-levâhık ve kâffetü’l-menâfi‘ ve’l-merâfık müşârün-ileyh hazretlerine yetmiş bin nakd-i râyic fi’l-vakt akçeye tarafeynden îcâb ve kabûlü hâvî bey‘-ı bâtt-ı sahîh-i şer‘î ile bey‘ u teslîm ol dahi vech-i muharrer üzere iştirâ ve kabûl ve kabz ve tesellüm eyledikden sonra semeni olan meblağ-ı mezbûr yetmiş bin akçeyi müvekkil-i müşârün-ileyh yedinden tamamen ahz u kabz edip ba‘de’l-yevm zikrolunan menzil müşteri-i müşârün-ileyhin mülk-i müşterâsıdır keyfe mâ yeşâ ve yahtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Sadi Çelebi b. Yahya Efendi, Abdurrahman Efendi b. Hüseyin Kâtib, Eyüp Efendi b. Hasan, Seyyid İsmail Efendi b. Seyyid İbrahim el-imâm, Mustafa Efendi b. Yahya Efendi, el-Hâc Mustafa b. Ali, Ali Çelebi b. Hızır, Halil Çelebi b. Mustafa