İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 304 Hüküm no: 283 Orijinal metin no: [35b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimar Hayreddin Evkafı odalarında sakin Sahak v. Kirya’nın kızı Sâre’nin merdivenden düşerek öldüğü Hüccet-i keşf-i hâlike. Mahmiye-i İstanbul’da Dikilitaş kurbünde Ali Paşa mahallesinde vâki‘ merhûm Mimar Hayreddin Evkāfı odalarında sâkin işbu râfi‘u’s-sifr Sahak v. Kirya nâm Ermeni meclis-i şer‘de takrîr-i kelâm edip târih-i kitâbdan bir gün mukaddem ba‘de’l-asr sagīre kızım Sâre sâkin olduğum evin nerdübânı başından ortada olan sahan açığına düşüp sağ kulağının üzeri berelenüp ve sağ omzu sıyrılıp ol darbdan hâlike olmuşdur hâlâ cânib-i şer‘den üzerine varılıp keşf ve tahrîr ve husûs kasaba ahâlî-i mahalle-i mezbûreden suâl olunmak matlûbumdur dedikde kıbel-i şer‘den Mevlânâ Mehmed Efendi irsâl olunup ol dahi zeyl-i kitâbda esâmîleri mastûr olan Müslimîn ile mezbûr Sahak’ın sâkin olduğu menziline varıp nazar ve müşâhede eyledikde fi’l-vâki‘ hâlike mezbûre Sâre’nin başının sağ kulağının üzeri delinip ve sağ omzu sıyrılıp ol sebebden hâlike olduğunu zeyl-i rakīmde mastûrü’l-esâmî olan kimesneler hâl bast olunan minvâl üzere olduğu her biri alâ-tarîkı’ş-şehâde haber verdiklerini mevlânâ-yı mezbûr mahâllinde vâki‘ hâli tahrîr birle ma‘an irsâl olunan Receb b. Osman ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî-gurreti şehr-i Ramazani’l-mübâre li-sene isnâ ve seb‘în ve elf. Şuhûdü’l-hâl: Mustafa Efendi b. Ramazan el-imâm, el-Hâc Davud b. Ali, Ahmed Halîfe b. Ahmed el-müezzin, el-Hâc Ahmed b. Mustafa el-kayyum, Mustafa b. Abdullah, Mehmed Beşe b. Abdullah, Mehmed Bey b. Abdullah, Ebûbekir Çelebi b. Abdurrahman, İsa Dede b. Sevindik.