İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 304 Hüküm no: 284 Orijinal metin no: [35b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mehmed’in saka bargiri ve at sakası gediğinin Mehmed Çelebi b. Hüseyin’e satıldığı Saka gediği hücceti. Dârü’l-hilâfeti’l-aliyye Kostantıniyyeti’l-mahmiye’de Samanviran mahallesinde sâkine Ahmed Ağa b. Mehmed tarafından husûs-ı âtîye vekîl olup Şaban Bey b. Mehmed ve Mahmud b. Hüseyin şehâdetleri ile şer‘an vekâleti sâbite olan Ali Beşe b. Mehmed meclis-i şer‘de işbu bâ‘isü’r-rakīm Mehmed Çelebi b. Hüseyin mahzarında bi’l-vekâle ikrâr ve i‘tirâf edip müvekkilim mezbûr sen saka bargiri ile bir saka meşkin mezbûr Mehmed Çelebi’ye bi-safkatin vâhidetin beş bin akçeye bey‘ u teslîm ol dahi iştirâ ve kabûl eyledikden sonra semeni olan meblağ-ı mezbûru yedinden ahz u kabz ettikden sonra Kırkçeşme’de vâki‘ at sakası gediğini dahi sakabaşı ma‘rifeti ile mezbûr Mehmed Çelebi’ye otuz beş bine ferâğ ve tefvîz ol dahi tefevvüz ve kabûl eyledikden sonra nakd-i mezbûr otuz beş bin akçeyi yedinden bi’t-tamam ahz eyledi dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sâbi‘ ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Hasan Beşe b. Bayram, Mehmed b. Mustafa, Mustafa b. Süleyman, Aydın b. Alim, İbrahim b. Selim, Haydar Beşe b. ( )