İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 305 Hüküm no: 285 Orijinal metin no: [35b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Haydar Beşe b. Süleyman’ın yüz guruşu vakfedip Abdullah Çelebi’yi vasî tayin ettiği Yüz guruş vakf. Mahmiye-i İstanbul’da Acemoğlanı meydânı kurbünde Balaban Ağa mahallesinde sâkin Haydar Beşe b. Süleyman meclis-i şer‘-i şerîf-i lâzımü’t-tevkīrde takrîr-i kelâm edip vaktâki bu dâr-ı Dünyâ bî-sebât ve bî-bekā olup sıhhatinin âkibeti mevt ve devletinin âhiri fevt-i na‘îm zıll-i zâil-i mukīm sıfât-ı râhil olup küllü nefsin zâ’ikatü’l-mevt mefhûm-ı şerîfi ma‘lûmum olmağın âlem-i fenâdan menzil-i bekāya rıhlet etmezden mukaddem ba‘zı hayrât-ı meberrât inşâsına niyet ve muzâfen ilâ mâ ba‘de’l-mevt şöyle vasiyet eyledim ki bi-irâdeti’l-meliki’l-müte‘âl bu dâr-ı fenâdan saray-ı bekāya irtihâl eylediğimde cümle mâlımın sülüsünden yüz kıt‘a riyâlî guruşu otuz altı ağa bölüğü odasına vakf ve zevcem Hadice’nin mehr-i müecceli olan elli kıt‘a riyâli zevceme verilip ve altmış riyâlî guruş dahi techîz ve tekfînime ve ıskāt-ı salât ve eyyâm-ı mu‘tâdda tabh ta‘âm olunup fukarâya bezl oluna deyü vasiyet ve bu vasiyetimi tenfîz için işbu Abdullah Çelebi’yi vasîyy-i muhtâr eyledim deyüp ol dahi vesâyet-i mezbûru kabûl ve hıdemâtın edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’s-sânî ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Vezneci el-Hâc Mehmed, Vezneci Şaban b. ( ), el-Hâc İvaz el-attar, Müezzin Mehmed Efendi, Sabuncu Mehmed Çelebi, Berber Mehmed Dede, Receb Beşe b. Abdullah, Hasan Beşe b. Ahmed, Derviş b. Yusuf Seroda, Süleyman Beşe b. Abdi, Mehmed Beşe b. Abdullah.