İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 308 Hüküm no: 289 Orijinal metin no: [36a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Bölükbaşı b. Abdullah’ın destgahı için Mustafa b. Mehmed’in yirmi beş bin akçeyi tahsile taahhüt ettiği Bakkal tâifesinden Hasan Bölükbaşı b. Abdullah meclis-i şer‘de tâife-i mezbûreden Mustafa b. Mehmed nâm kimesne mahzarında üzerine da‘vâ ve takrîr-i kelâm edip bundan akdem mezbûr Mustafa mahmiye-i İstanbul’da Unkapanı hâricinde Baltacı Hacı İbrahim dükkânı demekle ma‘rûf dükkânımda destgâhdârım iken nisbeten ba‘zı kimesnelere kırk bin akçelik eşyâ verip meblağ-ı mezkûr kırk bin akçenin yirmi beş bin akçesini cem‘ u tahsîl etmeye mezbûr Mustafa ta‘ahhüd eylemişdir suâl olunup takrîri tahrîr olunmak matlûbumdur dedikde gıbbe’s-suâl mezbûr Mustafa cevâbında fi’l-hakīka kazıyye bâlâda zikrolunduğu üzere olup mezbûr Hasan Bölükbaşı’nın zikrolunan dükkânında ben destgâhdârı iken nisbeten verilen kırk bin akçenin yirmi beş bin akçesini cem‘ u tahsîle ben mukaddemâ ta‘ahhüd etmişdim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: el-Hâc İbrahim Bey b. Abdullah, Osman Bey b. Abdullah, Hasan Beşe b. er-râcil, Ahmed Efendi b. Hanefî.