İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 310 Hüküm no: 291 Orijinal metin no: [36b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gazal v. Gazer’ın Agop v. Marat’a altı bin akçe borcu olduğu Mahmiye-i İstanbul’da Aksaray’da Dörtyolağzı nâm mevzi‘de vâki‘ Ekmekçi kurbünde hâlâ habbâz olan işbu bâ‘isetü’s-sifr Agop v. Marat nâm Ermeni mahfil-i kazâda bundan akdem dersgâh-dârım olan Gazal v. Gazer nâm Ermeni muvâcehesinde üzerine da‘vâ ve takrîr-i kelâm edip mezbûr Gazal nâm Ermeni destgâh-dârım iken zimmetinde ekmek bahâsından altı bin akçe hakkım olup târih-i kitâbdan dörd ay mukaddem meblağ-ı mezkûru taleb eylediğimde vech-i mübeyyen üzere altı bin akçe deyni olduğunu alâ-re’si’l-işhâd ikrâr dahi etmiş iken meblağ-ı mezbûr zimmetinde olup bana edâdan imtinâ‘ eder suâl olunsun dedikde gıbbe’s-suâl mezbûr Gazal cevâbında meblağ-ı mezbûrun dört bin beş yüz akçesini ikrâr ve ziyâde bin beş yüz akçesini inkâr edicek müdde‘î-i mezbûrdan müdde‘âsını mübeyyin beyyine taleb olundukda ekmekçi tâifesinden Kirkor v. Hindi ve Avak v. Kasir nâm Ermeniler li-ecli’ş-şehâde meclis-i şer‘a hâzırân olup istişhâd olunduklarında fi’l-hakīka mezbûr Gazal târih-i mezkûrda bizim huzûrumuzda mersûm Agop Ermeni’ye zikri mürûr eden ekmek bahâsından altı bin akçe zimmetimde deynim vardır deyü bi-tav‘ihiikrâr ve bizi işhâd eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâ’iti’’l-kabûl şehâdetleri makbûle oldukdan sonra müdde‘î-i mezbûr Agob’a meblağ-ı mezbûr altı bin akçeyi edâ ve teslîme mezbûr Gazal’a tenbîh olunup mâ-vaka‘a bi’t-taleb ketb olundu. Fî-gurreti Ramazani’l-mübârek li-sene isnâ ve seb‘în ve elf. Şuhûdü’l-hâl: Abdi Çelebi b. Hüseyin, Kasab Mustafa b. Mehmed, Veli b. Mahmud, Rasûl b. Rıdvan, Osman Bölükbaşı.