İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 311 Hüküm no: 292 Orijinal metin no: [36b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim Beşe’nin Abdülbaki b. Ali’ye otuz guruş borçlu olduğu Mahmiye-i İstanbul’da Odunkapısı kurbünde kundakçı tâifesinden Abdülbaki b. Ali nâm kimesne meclis-i şer‘de yine tâife-i merkūmeden Abdülkerim Beşe b. ( ) mahzarında üzerine da‘vâ edip mukaddemâ kundakçılık san‘atıyla mevkūf şâkird olup san‘at-ı merkūmeyi ba‘de’t-tahsîl başka çıkmağa izin taleb eylediğimde rüşvet nâmına benden otuz riyâlî guruş almış idi hâlâ meblağ-ı mezbûru merkūmdan taleb ederim suâl olunsun dedikde gıbbe’s-suâl mezbûr Abdülkerim mezbûr kendi şâkirdi olup başka çıkardığını ikrâr lâkin rüşvet nâmına merkūmdan otuz riyâlî guruş kabz eylediğini inkâr eyledikde müdde‘î-i merkūmdan müdde‘âsı için beyyine taleb olundukda ityân-ı beyyineden izhâr-ı acz edip istihlâf etmeğin merkūm Abdülkerim Beşe’ye ber-minvâl-i muharrer mezbûru başka çıkardığında merkūmdan rüşvet nâmına otuz riyâlî guruş ahz eylemediğine yemîn teklîf olundukda mezbûr Abdülkerim Beşe yemînden nükûl etmeğin nükûlü ile meblağ-ı mezbûru müdde‘î-i mezbûra red ve teslîme merkūm Abdülkerim Beşe’ye tenbîh olunup mâ hüve’l-vâki‘ bi’t-taleb ketb olundu. Fi’s-sâlis min-Ramazani’l-mübârek li-sene isnâ ve seb‘în ve elf. Şuhûdü’l-hâl: Mustafa Beşe b. Hasan el-mübâşir, Mustafa Efendi el-kâtib, Abdi Çelebi b. Hüseyin, Gazanfer b. Tevekkül, Şükrullah b. Mustafa.