İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 311 Hüküm no: 293 Orijinal metin no: [36b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Halil’in atının ölümüne sebep olan Abdi b. Yusuf’un vasîsinden diyet alındığı Deynden zimmetini ibrâ. Mahmiye-i İstanbul’da Balkapanı kurbünde sâkin Mehmed b. Halil meclis-i şer‘de mahmiye-i mezbûrede Altıpoğaça mahallesinde Abdi b. Yusuf nâm sagīrin kıbel-i şer‘den mansûbe vasîsi olan Emine bt. İbrahim Ağa mahzarında ikrâr ve i‘tirâf edip sagīr-i mezbûru mezbûr Yusuf Çavuş bundan akdem zikrolunan Balkapanı kurbünde olan sokakda ben bir kimesnenin atına binip giderken mezbûr Yusuf Çavuş dahi ol sokakda giderken bindiğim at ürküp koşdukda atın başını alıp başını semt-i âhara imâle edip döndürmeye kādir olmamakla merkūm Yusuf Çavuş üzerine uğrayıp merkūmu çiğneyip at mezbûrun üzerine ve yine âhar mevzi‘e düşdükden sonra mezbûr Yusuf savrulmaya kādîr olmayıp ondan nâşî fevt olmağla vasîyy-i mezbûra yedinden deynini da‘vâ ve taleb eyledikde udûl-i ahrâr-ı ricâlden Ahmed Çelebi b. Ali ve Mehmed Çelebi b. Musa ve Mehmed b. Said ve Dilaver b. Abdullah ve Mehmed Çelebi b. Hüsrev ve Ahmed Çelebi b. el-Hâc Hasan nâm kimesneler kazıyye bâlâda tafsîli mürûr ettiği vech üzere olduğunu alâ-tarîkı’ş-şehâde haber verdiklerinde ben dahi bana diyet lâzım gelmek zu‘mu ile sagīr-i mezbûra on bin akçe vermiş idim hâlâ bana şer‘an diyet lâzım gelmeğin meblağ-ı mezbûru vasîyy-i mezbûrdan da‘vâ ve taleb etmiş idim el-hâletü hâzihî melağ-ı mezbûr da‘vâsından sagīr-i mezbûrun zimmetini ibrâ ve ıskāt eyledim ba‘de’l-yevm husûs-ı mezbûra müte‘allik da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Min-gurre-i şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: Mehmed Ağa b. Ahmed Efendi, Keşfî Mustafa Efendi, el-Hâc Ahmed b. Mahmud, Abdi b. Hüseyin, Şükrullah b. Mustafa, Rasûl b. Rıdvan.