İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 312 Hüküm no: 294 Orijinal metin no: [37a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sahak v. Mizvar’ın menzil hissesini Asvador v. Arakil kendi üzerine yazdırdığı Mahmiye-i İstanbul’da merhûm Vâlide Sultan hânında sâkin iken bundan akdem hâlike olan Sagar v. Homerd nâm Ermeni’nin verâseti li-ebeveyn er karındaşı Ağya nâm Ermeni’ye ve li-ebeveyn kız karındaşları Benefşe ve Zahile nâm Ermeniyelere münhasıra olup kable’l-kısme mezbûr Ağya dahi hâlik olup verâseti zevce-i metrûkesi Hanzede nâm Nasrâniye ile sulbî sagīr oğlu Girakor’a münhasıra olduğu şer‘an zâhir ve müte‘ayyin oldukdan sonra merkūmân Benefşe’nin zevci ve tarafından husûs-ı âti’l-beyâna ve husûmet ve redd-i cevâba sâbitü’l-vekâle vekîl olmağla vekâlet ve sagīr-i mezbûr Kirkor’un kıbel-i şer‘den mansûb vasîsi olmağla vesâyeten merkūmetân Zahile ile Hanzede asâleten mahfil-i kazâda bundan akdem Sulu Manastır’da sâkin iken hâlik olan Sahak v. Mizvar nâm Ermeninin sulbiye kebîre kızı Meryem’in tarafından husûs-ı âti’l-beyâna sâbitü’l-vekâle vekîli olan zevci Haçador v. Ferhad muvâcehesinde üzerine bi’l-vekâle ve bi’l-vesâye da‘vâ ve takrîr-i kelâm edip hâlik-i mezbûr-ı sagīrin terekesinden olup mahmiye-i mezbûrede Sulu Manastır Kilisesi kurbünde vâki‘ üç tarafı kilise vakfı ve bir tarafı tarîk-i âm ile mahdûd iki bâb fevkānî oda ve bir sofa ve üç bâb tahtânî oda ve kenîfi ve havluyu müştemil olan menzili yine Sulu Manastır’da sâkin Asvador v. Arakil nâm Ermeni nefsi’çün iştira edip kendi üzerine hüccet-i şer‘iye ettirdikden sonra mûrisimiz mezbûr sagīr hâlik olmağla vâris-i şer‘î ile intikāl etmiş iken vekîl-i mezbûr menzil-i mahdûd-ı mezbûra bi-gayr-ı hakkın vaz-ı yed eylemişdir hâlâ suâl olunsun dediklerinde gıbbe’s-suâl merkūm Haçador cevâbında verese-i merkūmenin mûrisleri olan mezbûr Sahak hâl-i hayatında zikri mürûr eden menzil hâlik-i mezbûr sagīre kendi mâlından elli bin akçe verip vârisim için mezbûr Asvador’dan ol menzili iştirâ ediver deyip ol dahi varıp menzil-i mezbûrun akçesi ile iştirâ eder dedikden sonra zikrolunan menzili ben galat? edip kendi üzerime hüccet ettirdim ammâ fi’l-hakīka semeni menzil-i mezbûr merkūm Sahak zimmînindir ve ben ol menzili onun için iştirâ eyledim onun mülk-i müşterâsıdır deyü huzûr-ı cemâ‘atte ikrâr dahi etmişdir deyü da‘vâ def‘le mukābele eyledikde gıbbe’s-suâl def‘-i mezbûru mezkûrlar münkirler olmağın merkūm Haçador’dan def‘-i merkūmu mübeyyin beyyine taleb olundukda Sulumanastır sükkânından Simadin Papas v. Papa Avanos ve Gazel Papas v. Panon ve David Papas v. Pellis Malkoç nâm Ermeniler li-ecli’ş-şehâde meclis-i şer‘a hâzırûn olup isre’l-işhâd fi’l-hakīka hâlik-i mezbûr sagīr zikrolunan menzil-i mezkûr Asvador’dan hâlik-i mezkûr Sahak zimmînin mâlına mezbûr Sahak için elli bin akçeye iştirâ ediverdim ba‘dehû galat edip hücceti kendi üzerime yazdırdım ol menzil mezbûr Sahak zimmînin mülk-i müşterâsıdır deyü bizim huzûrumuz[da] ikrâr ve bizi işhâd eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince müdde‘ûn-ı merkūmûn bî-vech mu‘ârazadan men‘ olunup mâ-vaka‘a bi’t-taleb ketb olundu. Fî-gurreti Ramazani’l-mübârek li-sene isnâ ve seb‘în ve elf. Şuhûdü’l-hâl: el-Hâc Ahmed b. Mahmud, Abdi b. Hüseyin, Mehmed b. Ramazan, Hüseyin b. Ebûbekir, Ahmed b. Hanefî, Rasûl b. Rıdvan, Veli b. Mahmud