İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 313 Hüküm no: 295 Orijinal metin no: [37a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Veziriazam Ahmed Paşa’nın menzilinin Hüseyin Ağa’ya hibe edildiği Hüccet-i kanavât-ı vezîr-i a‘zam. Husûs-ı âti’l-beyânın mahâllinde tahrîri iltimâs olunmağın savb-ı şer‘den mevlânâ Keşfî Mustafa Efendi irsâl olunup ol dahi mahmiye-i İstanbul’da merhûm Sultan Süleyman Câmi‘-i şerîfi kurbünden Siyavuşpaşa Sarayı demekle ma‘rûf saraya varıp zeyl-i rakīmde isimleri mastûr olan Müslimîn huzûrlarında akd-i meclis-i şer‘ eyledikde bi’l-fi‘il sahib-i sadâret-i uzmâ olan vezîriazam-ı zî-şân hazret-i Ahmed Paşa yesserallâhu mâ yürîdü ve mâ yeşâ kıbel-i âlîlerinden ikrâr-ı âti’l-beyâna vekîl olup fahrü’l-a‘yân Osman Ağa b. Murtaza ve el-Hâc Abdülmümin Ağa b. Yakub şehâdetleri ile şer‘an vekâleti sâbite olan umdetü’l-emâcid ve’l-a‘yân el-Hâc Ebûbekir Ağa b. Murad meclis-i ma‘kūd-ı mezbûrda müvekkil-i müşârün-ileyh hazretlerinin ammi-zâdeleri işbu kitâb-ı sıhhat-nisâbın yed-i kerîmelerine vusûl ile şeref-yâb olan umdetü’l-e‘âzım ve’l-e‘âlî câmi‘ü’l-mehâmid ve’l-meâli Hüseyin Ağa tarafından ikrâr-ı âti’z-zikri tasdîke sâbitü’l-vekâle vekîl olan fahrü’l-a‘yân Oruç b. Hüseyin mahzarında bi’l-vekâle ikrâr ve i‘tirâf edip müvekkil-i müşârün-ileyh hazretleri mukaddemâ menzil-i mezbûrun dâhiliyesini ba‘de’l-ifrâz merkūm Hüseyin Ağa’ya hîbe-i tâm ile hîbe eylemiş idi hâlâ dâhiliyede vâki‘ bir kebîr su hazînesine Kırkçeşme suyundan cârî bir masûra su ve Süleymâniye suyundan cârî bir masûra suyu müştemil ve kanavâtıyla hakk-ı tasarrufunu mütevellîsi ( ) ağa ve hâlâ su nâzırı olan Mustafa Ağa b. İbrahim ma‘rifetleri ile müvekkil-i müşârün-ileyh Hüseyin Ağa’ya fâriğ olmuşdur ol vechile zikrolunan su seyl-i kanavât ile müvekkil-i mûmâ-ileyh Hüseyin Ağa’nın hakk-ı müfevvezî olmuşdur keyfe mâ yeşâ mutasarrıf [olsun] dedi dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahâllinde tahrîr ba‘de ma‘an irsâl olunan Mustafa b. Mehmed ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’t-tâsi‘ min-şehr-i Ramazan sene 1073. Şuhûdü’l-hâl: Mehmed Çelebi b. Mustafa, Osman Bey b. Mustafa, el-Hâc Abdülmümin b. Yakub, Ahmed Çelebi b. Abdünnebi, Hasan Beşe b. Abdullah, İsmail Çelebi b. İbrahim, Ömer b. Yusuf, Mustafa Bey b. Mehmed Paşa, Ali Bey b. Mehmed Paşa.