İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 314 Hüküm no: 296 Orijinal metin no: [37a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Ahmed’in vakfiyesi Vasiyetnâme. Mahmiye-i İstanbul’da Karagümrük kurbünde Ali Paşa-yı Atik mahallesinde sâkin Mustafa Beşe b. Ahmed nâm kimesne meclis-i şer‘-i hatîrde takrîr-i kelâm edip vaktâki bu dâr-ı dünyâ bî-sebât ve bî-bekā olup sıhhatinin âkıbeti mevt ve devletinin âhiri fevt na‘îmi zıll-i zâil mukīmi dayf-ı râhil olup küllü nefsin zâikatü’l-mevt mefhûm-ı şerîfi ma‘lûmum olmağın âlem-i fenâ ve şuhûddan menzil-i bekā-i halûda rıhlet etmezden mukaddem ba‘zı sadakāt-ı mebrûre inşâsına niyet ve muzâfan âtî mâ ba‘de’l-mevt şöyle vasiyet eyledim ki bi-irâdeti’l-meliki’l-müte‘âl bu dâr-ı dünyâdan saray-ı ukbâya irtihâl eylediğimde silk-i mülkümde olan bir kazgan-ı kebîr zikrolunan Ali Paşa-yı Atîk Câmi‘i mahallesinde vakf ola ve dahi cümle mâlımın sülüsünden techîz ve tekfîn ve ıskāt-ı salât ve eyyâm-ı mu‘tâdede ve necîbü’l-âde tabh-ı ta‘âm olunup fukarâya bezl oluna deyü vesâyâ-yı mezkûremi tenfîz için Veli Beşe b. Abdullah’ı vasî nasb ve ihtiyâr ve Yusuf b. Abdullah nâm kimesneyi vasîyy-i mezbûr üzerine nâzır ta‘yîn edip onlar dahi vesâyet ve nezâreti kabûl ve hıdemâtını edâya ta‘ahhüd eylediler dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâmin ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: İbrahim Efendi b. el-kādî, Ahmed Efendi el-imâm, Seyyid Mustafa Çelebi b. ( ), Ağazâde Mustafa Çelebi b. ( ), Ali b. Halil, Ali Çelebi b. Ahmed, Mustafa b. Yusuf, Hamza Beşe b. Bilal, Ebûbekir b. Mehmed, Mehmed Beşe b. Musli