İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 316 Hüküm no: 298 Orijinal metin no: [37b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Bey b. Mustafa’nın Ali b. Hacı’dan satın aldığı sırada Rus asıllı Belkıs bt. Abdullah isimli cariyenin ayıplı olmadığı Mahmiye-i İstanbul’da Kesmekaya kurbünde Hamamcı Muhyiddin mahallesinde sâkin Ahmed Bey b. Mustafa nâm kimesne meclis-i şer‘de mahmiye-i mezbûrede Yenibahçe’de Hürremçavuş mahallesinde sâkin işbu râfi‘u’l-vesîka Ali b. Hacı nâm kimesne mahzarında üzerine da‘vâ ve takrîr-i kelâm edip târih-i kitâbdan on gün mukaddem işbu orta boylu açık kaşlı Rusiyyetü’l-asl Belkıs bt. Abdullah nâm câriyeyi mezbûr Ali’den dokuz bin yedi yüz akçe semen-i medfû‘a sâlimeten ani’l-uyûb iştirâ ve tesellüm etmiş idim câriye-i merkūmenin sar‘a marazı olmağla ondan nâşî sağ kolu bozulup mu‘ayyebe olduğuna muttali‘ oldum ayb-ı merkūm bey‘ u şirâdan mukaddem ârız ve inde’t-tüccâr noksan semen îcâb eder ayıbdır reddolunup semen-i mezbûr alıverilmek taleb ederim suâl olunsun dedikde evvelen tevccüh-i husûmet için bu makūle emrâzı teşhîse taraf-ı şehriyârîden me’mûr olan Mustafa Efendi b. Mehmed ve Ahmed Efendi b. Mehmed nâm tabîblere câriye-i merkūme irâet olundukda onlar dahi ba‘de’l-em‘âni’n-nazar maraz-ı mezbûr ile mu‘ayyebe olduğunu ihbâr ettiklerinden sonra mezbûr Ali suâl olundukda câriye-i merkūmeyi târih-i mezbûrda müdde‘î-i merkūma dokuz bin yedi yüz akçe semeni medfû‘a bey‘ini ikrâr lâkin maraz-ı mezbûrun hîn-i bey‘de vücûd-ı marazı inkâr edicek müdde‘î-i mezbûrdan ayb-ı merkūmun bâyi‘-i mezbûr katında vücûd-ı marazı mübeyyin beyyine taleb olundukda ityân-ı beyyineden izhâr-ı acz edip istihlâf etmeğin bâyi‘-i mezbûr Ali’ye câriye-i mezkûreyi müdde‘î-i mezbûra bey‘ eylediği hînde ayb-ı mezbûr câriye-i merkūmede mevcûd olduğunu bildiğine yemîn teklîf olundukda ol dahi alâ-mâ hüve’l-mesûl halfü billâhi’l-aliyyü’l-azîm etmeğin mu‘ârazadan men‘ birle mâ-vaka‘a bi’t-taleb ketb olundu. Fi’s-sânî min-şehr-i Ramazani’l-mübârek li-sene isnâ ve seb‘în ve elf Şuhûdü’l-hâl: Sefer Bey b. Ömer, Yakub b. Ankud, Ali b. Hüseyin, Kaya b. Ferid, Mehmed b. Mustafa, Mehmed b. İbrahim.