İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 322 Hüküm no: 307 Orijinal metin no: [38b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Beşe b. Ali’nin vefat eden kardeşi İslam Beşe’nin iş ortağı Esedullah’tan alacağını tahsil ettiği Dergâh-ı âlî yeniçerilerinin on sekizinci cemâ‘atinin yoldaşı Ahmed Beşe b. Ali nâm râcil meclis-i şer‘de işbu râfi‘u’l-kitâb Esedullah b. Abdülmalik nâm mumcu mahzarında ikrâr ve takrîr-i kelâm edip mahrûse-i Galata’da Karaköy mahallesinde sâkin iken vefât edip verâseti bana münhasıra olan karındaşım İslam Beşe’nin mezbûr Esedullah kereste alıp satmakla şerîki olmağın mal-ı şirketden karındaşım müteveffâ-yı mezbûrun hakkı olup mezbûr Esedullah yedinde olan kırk bin akçeyi verâsetim hasebiyle mezbûr Esedullah yedinden bi’t-tamam ve’l-kemâl alıp kabz eyledim min-ba‘d meblağ-ı mezbûrdan mezbûr Esedullah yedinde bir akçe ve bir habbe bâkī kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sânî min-şehr-i Ramazani’l-mübârek li-sene isnâ ve seb‘în ve elf. Şuhûdü’l-hâl: es-Seyyid Mustafa Çelebi b. Mehmed, Mehmed Efendi el-imâm, Süleyman Beşe b. Hüseyin, Seyyid Mehmed b. Abdülkerim, Mehmed Beşe b. Yusuf, Ahmed Beşe b. Ali