İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 326 Hüküm no: 313 Orijinal metin no: [39b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimo v. Yorgi’nin menzil hisselerini validesi Peturye bt. Yani’ye sattığı Mübâya‘a. Mahmiye-i İstanbul’da Samatyakapısı kurbünden sâkin iken bundan akdem hâlik olan Todori nâm zimmînin verâseti zevce-i metrûkesi Peturye bt. Yani nâm Nasrâniye ve sulbî kebîr oğulları Dimo ve Yorgi ve kendiden sonra şeref-i İslâm ile müşerrefe olan el-Hâc Süleyman b. Abdullah’a münhasıra olduğu şer‘an zâhir ve mütehakkık oldukdan sonra tashîh-i mes’eleleri yirmi dört sehimden olup sihâm-ı mezbûrun üç sehmi mezbûre Peturye’ye ve yedi sehmi mezbûr Dimo ve Yorgi’ye ve yedişer sehmi dahi mezbûr el-Hâc Süleyman’a â’id olmağla mezbûr Yorgi meclis-i şer‘-i hatîr-i lâzımü’t-tevkīrde vâlidesi mezbûre Peturye muvâcehesinde ikrâr ve takrîr-i kelâm edip mahalle-i mezbûrede vâki‘ bir tarafı benim mülk-i âharım ve bir tarafı Sultan nâm Nasrâniye mülkü ve bir tarafı Kara Mustafa mülkü ve bir tarafı tarîk-i âm ile mahdûd olan mülk menzilde olan yedi hissemi mezbûre Peturye’ye sekiz bin akçe râyic fi’l-vakt fıddî akçeye bey‘-ı bâtt-ı sahîh-i şer‘î ile bey‘ u teslîm ol dahi minvâl-i muharrer üzere iştirâ ve kabûl eyledi dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Tahrîren fi’l-yevmi’l-hâmis min-şehr-i Ramazani’l-mübârek li-sene isneyn ve seb‘în ve elf. Şuhûdü’l-hâl: Ahmed Efendi b. el-Hâc İbrahim, Mustafa b. Mehmed, Rasûl b. Rıdvan, Mustafa b. İsa ve gayruhum