İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 327 Hüküm no: 314 Orijinal metin no: [39b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi b. Yusuf Çavuş’un babasını atının ürkmesi sonucu öldüren Yusuf Çavuş’un diyet ödediği Mahmiye-i İstanbul’da Balkapanı kurbünde sâkin Mehmed b. Halil meclis-i şer‘de mahmiye-i mezbûrede Altıpoğaça mahallesinde sâkin Abdi b. Yusuf Çavuş nâm sagīrin kıbel-i şer‘den mansûbe vasîsi olan Emine bt. İbrahim Ağa’nın mahzarında ikrâr ve i‘tirâf edip sagīr-i mezbûrun babası mezbûr Yusuf Çavuş bundan akdem zikrolunan Balkapanı kurbünde olan sokakda bir kimesnenin ben atına binip giderken mezbûr Yusuf Çavuş dahi ol sokakda gezerken bindiğim at ürküp koşdukda onun başı yek? olup başı semt-i âhara îmâle edip döndürmeye kādir olmamakla merkūm Yusuf Çavuş’un üzerine uğrayıp merkūmu çiğneyip at-ı mezbûrun üzerinden ben âhar mevzi‘edüşdükden sonra mezbûr Yusuf Çavuş savulmağa kādir olmayıp ondan nâşî fevt olmağla benden vasîyy-i mezbûr diyetini da‘vâ ve taleb eyledikde udûl-i ahrâr-ı ricâl-i Müslimînden olup Mustafa b. Ali ve Mehmed Çelebi b. Musa ve Mehmed b. Said ve Dilaver b. Abdullah ve Mehmed Çelebi b. Hüsrev ve Ahmed Çelebi b. el-Hâc Hasan nâm kimesneler kazıyye bâlâda tafsîli mürûr ettiği vech üzere olduğunu alâ-tarîkı’ş-şehâde haber verdiklerinde ben dahi bana diyet lâzım gelmek zu‘miyle sagīr-i mezbûra on bin akçe vermiş idim. Hâlâ bana şer‘an diyet lâzım gelmemeğin meblağ-ı mezbûru da‘vâ ve taleb etmiş idim el-hâletü hâzihî meblağ-ı mezbûr da‘vâsından sagīr-i mezbûrun zimmetini ibrâ ve ıskāt eyledim ba‘de’l-yevm husûs-ı mezbûra müte‘allik da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 Ramazani’l-mübârek li-sene [10]73 Şuhûdü’l-hâl: Mehmed Ağa b. Ahmed Efendi, Gürcü Mustafa Efendi, el-Hâc Ahmed b. Mahmud, Rasûl b. Rıdvan, Mustafa b. Mehmed, Veli b. Mahmud.