İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 328 Hüküm no: 315 Orijinal metin no: [39b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasbi Çavuş b. Abdullah’ın bahçesini Mehmed b. Mustafa’ya istiğlal yoluyla sattığı Vekâlet. Mahmiye-i İstanbul’da Demirhan mahallesi sâkinlerinden Hasbi Çavuş b. Abdullah nâm kimesne meclis-i şer‘-i hatîrde Karaman’da Larende kazâsına tâbi‘ Madenşehri nâm karye avârızına mevkūfe nükūdun mütevellîsi olan el-Hâc Mehmed b. Mustafa mahzarında ikrâr ve i‘tirâf edip mahalle-i mezbûrda bir tarafdan Sırrı Paşa Vakfı ve bir tarafdan Babaefendi Vakfı ve bir tarafdan Fâtıma Hatun mülkü ve bir tarafdan tarîk-i âm ile mahdûd tûlen yirmi ve arzan on beş zirâ‘ olup mâ-i cârî ve eşcâr-ı müsmire ve gayr-ı müsmireyi hâvî mülk bahçemi bi-tarîkı’l-istiğlâl mezbûr el-Hâc Mehmed’e üç yüz otuz riyâlî guruşa bey‘ u teslîm ol dahi mal-ı vakf-ı mezbûr ile iştirâ ve kabûl eyledikden sonra semeni olan meblağ-ı mezbûr üç yüz otuz guruşu mezbûr el-Hâc Mehmed yedinden bi’t-tamam ahz u kabz eylediğimde bahçe-i merkūmeyi ba‘de’t-tahliyeti’ş-şer‘iye ve’t-takābuzü’l-mer‘î târih-i kitâbdan yüz yirmi gün tamamına değin bin akçeye mütevellî-i mezbûrdan istîcâr ve kabûl edip ol dahi îcâr ve teslîm eyledi dedikde, gıbbe’t-tasdîkı’ş-şer‘î mezkûr Hasbi Çavuş meclis-i mezbûrede Süleyman Çelebi b. Mustafa nâm kimesne mahzarında ikrâr ve i‘tirâf edip eğer meblağ-ı mezbûr üç yüz otuz guruşu müddet-i mezkûr tamamına değin edâ ve teslîm etmezsen bahçe-i mezbûreyi semen-i misli ile bey‘ ve semeninden deyn-i merkūma edâ ve teslîm ve bakiyyesini bana îsâle tarafımdan mezbûr Süleyman Çelebi’yi azl ve in‘izâlden masûne vekâlet-i devriye ile vekîl nasb ve ta‘yîn eyledim dedikde ol dahi vekâlet-i mezbûreyi kabûl ve hıdmet-i lâzımesini edâya ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis min-Ramazani’l-mübârek li-sene isnâ ve seb‘în ve elf. Şuhûdü’l-hâl: Mustafa Çavuş b. Mehmed, Odabaşı Mustafa Çelebi b. Mehmed, Hacı Mehmed b. Yusuf, Osman Beşe b. Ali, Hacı İbrahim b. Süleyman, Osman Beşe b. Yusuf, Bekir b. Süleyman, Cafer b. Mehmed.