İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 328 Hüküm no: 316 Orijinal metin no: [40a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ramazan Beşe b. İbrahim’in Yorgi v. Esteryo’dan alacak davasında sulh oldukları Sulh. Dârü’l-hilâfeti’l-aliyye Kostantıniyyeti’l-mahmiye de Mirahur mahallesinden Ramazan Beşe b. İbrahim meclis-i şer‘de işbu bâ‘isü’s-sifr Yorgi v. Esteryo nâm zimmî muvâcehesinde ikrâr ve i‘tirâf edip mezbûr Yorgi zimmetinde cihet-i karz-ı şer‘îden yirmi bin akçe ve beynimizde ma‘lûm dükkân ücretinden ba‘de küllî hesâb bin iki yüz elli akçe ki cem‘an yirmi bin iki yüz elli akçe hakkım olup meblağ-ı mezbûrun altı bin yüz kırk akçesini yedinden ahz u kabz edip bâkī on beş bin yüz on akçeyi mezbûrdan da‘vâ ve taleb eylediğimde beynimizde münâza‘ât-ı kesîre cereyân etmiş idi el-hâletü hâzihî da‘vâ-yı mezbûreden merkūm Yorgi tavassut-ı muslihîn ile beş bin beş yüz akçe üzerine inşâ-i akd-i sulh eyledikde ben dahi sulh-i mezbûru kabûl ve bedel-i sulh olan meblağ-ı mezbûr beş bin beş yüz akçeyi mezbûr Yorgi yedinden bi’t-tamam ahz u kabz edip husûs-ı mezbûra müte‘allik da‘vâdan mezbûr Yorgi’nin zimmetini ibrâ ve ıskāt eyledim ba‘de’l-yevm mezbûr Yorgi ile husûs-ı mezbûra müte‘allika da‘vâ ve nizâ‘ım ve alâka ve medhalim yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’s-sânî min-Ramazani’l-mübârek li-sene isnâ ve seb‘în ve elf. Şuhûdü’l-hâl: Abdi Çelebi b. Hüseyin, Mehmed b. Ramazan, Hasan b. Bayram, Mustafa b. İsa, Osman b. Abdullah.