İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 329 Hüküm no: 317 Orijinal metin no: [40a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kızılmescid mahallesinde yanan mescidin inşasını mütevelli Sefer Beşe b. Abdullah’ın kendi malından tamamlamayı taahhüt ettiği Mahmiye-i İstanbul’da Kızılmescid mahallesinde sâkin olup mescid-i mezbûr vakfına sâbıkā hasbî mütevellî olan el-Hâc Mehmed b. Kasım tarafından ikrâr-ı câ’i’z-zikre vekîl olup Ahmed Çelebi b. Mustafa ve Hüseyin Çelebi b. Mustafa nâm kimesneler şehâdetleri ile vekâleti sâbite olan Ahmed Efendi b. Ömer nâm kimesne meclis-i şer‘-i şerîfde vakf-ı mezbûra hâlâ hasbî mütevellî olan hâfızü’l-vesîka Sefer Beşe b. Abdullah mahzarında zeyl-i vesîkada isimleri mastûr olup mahalle-i merkūme ahâlîsi olan Müslimîn muvâcehelerinde bi’l-vekâle ikrâr ve takrîr-i kelâm edip müvekkilim merkūm el-Hâc Mehmed bu sene-i mübârekede hâcc-ı şerîfe tevcîh ve azîmet edip mahalle-i merkūme avârızına mevkūfe nükūddan kendi mesârifine sarf ile istihlâk edip zimmetinde deyn olan yirmi bin akçeyi vakıf için mütevellî-i merkūm Sefer Beşe’ye edâ eyledikden sonra harîk-i kebîrde muhterik olan mescid-i mezbûra mevkūfe nükūddan bu âna gelince otuz bin akçe harc ve sarf edip henüz ol mescid nâ-tamam olup tamam olunca binada vakfına müsâ‘ade olmamakla kendi mâlından teberru‘an ol mescidi yaptırmaya ta‘ahhüd eyledi dedikde, gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis aşer min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Pîrî Çelebi b. Ferruh, Ali Beşe b. Mehmed, Hasan Beşe b. Cafer, Ali Çelebi b. İbrahim, Durmuş Beşe b. Abdullah, Çorbacı Mustafa Ağa, Ahmed Çelebi b. Süleyman, Hammâmî Hüseyin Bey el-cündî, Pir Hüseyin Bey b. Abdullah, Mehmed Beşe b. Mustafa, Abdülkerim Beşe b. Durmuş, Abdullah b. Cafer.