İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 330 Hüküm no: 319 Orijinal metin no: [40a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Bahaeddin’in alacak davasında Abdullah b. Abdullah ile sulh oldukları Sulh. Mahmiye-i İstanbul’da Kırkçeşme kurbünde sâkin Ahmed b. Bahaeddin meclis-i şer‘de işbu râfi‘u’l-kitâb Abdullah b. Abdullah mahzarında ikrâr ve takrîr-i kelâm edip verâseti bana münhasıra karındaşım olup vilâyet-i Rumeli’nde İbrail kasabasında vefât eden el-Hâc Mehmed’in mezbûr Abdullah’ın kızı nâmzedi olmağla iki yüz guruşluk eyşâsını mezbûr Abdullah kıbelinden vaz‘ eylemiş idi deyü mezbûr Abdullah’dan bundan akdem da‘vâ ve taleb eylediğimde ol dahi inkâr etmekle beynimizde münâza‘ât-ı kesîre sudûrundan sonra vesâtet-i muslihîn ile mezbûr Abdullah benimle da‘vâ-yı meşrûhamdan iki bin altı yüz akçe üzerine inşâ-i akd-i sulh eyledikde ben dahi mezbûrun hasran vârisi olmağla sulh-i mezbûru kabûl ve bedel-i sulh olan meblağ-ı mezbûru tamamen yedinden alıp kabz edip da‘vâ-yı meşrûhamdan zimmetini ibrâ ve ıskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-hâmis min-Ramazani’l-mübârek li-sene isnâ ve seb‘în ve elf. Şuhûdü’l-hâl: Ali Efendi b. el-Hâc Hüseyin el-imâm, Mehmed b. Osman, Bayram Beşe b. Mehmed, Ebûbekir b. Himmet, Hasan b. Ali.