İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 331 Hüküm no: 320 Orijinal metin no: [40a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Bahaeddin’in vefat eden kardeşi Mehmed’in Abdullah b. Abdullah’daki eşyalarının tamamını aldığı İrsen intikāl-i eşyâ. Vilâyet-i Rumeli’nde İbrail kasabasında vefât eden el-Hâc Mehmed’in li-ebeveyn karındaşı ve hasran vârisi olan Ahmed b. Bahaeddin meclis-i şer‘de işbu râfi‘u’l-kitâb Abdullah b. Abdullah mahzarında ikrâr ve takrîr-i kelâm edip mûrisim müteveffâ-yı mezbûr hâl-i hayatında silk-i mülkünde olan eşyâsından bir miskî köhne kaftan ve bir köhne ıskarlet ve bir köhne yeşil dolama ve bir köhne yeşil yelek ve bir köhne çakşır ve bir köhne yeşil ıskarlet ferâce ve bir mâ’î dolama ve bir kızıl çubuk ferâce ve bir neftî zibun ve bir kırmızı barata ve iki münakkaş makrama ve bir yarım sarık ve bir tencere ve bir kebîr tas ve bir ibrik ve bir teknîden? kuşak ve bir köhne tepsi ve üç fincan ve bir balta ve bir bıçak ve bir külünk ve iki nakış kebe ve bir beyaz köhne velence ve bir mâ’i velence ve bir köhne minder ve bir köhne beledî yasdık ve bir köhne garar ve bir köhne ocak perdesi ve bir köhne ağaç sandık ve bir la‘l hâtemini mezbûr Abdullah katında emânet vaz‘ ve teslîm edip kable’l-ahz vefât etmeğin eşyâ-i merkūme ırsen bana intikāl eylemişdir el-hâletü hâzihî eşyâ-i merkūmeden yedinde bir şey bâkī kalmadı dedikde gıbbe’t-tasdîk vâki‘ hâl bi’t-taleb ketb olundu. Fi’l-hâmis min-Ramazani’l-mübârek li-sene isnâ ve seb‘în ve elf. Şuhûdü’l-hâl: es-Sâbıkūn.