İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 332 Hüküm no: 322 Orijinal metin no: [40b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed b. Mustafa ile diğer iki ortağının Yalvaç’taki menzillerini Arap Süleyman b. Abdullah’a sattıkları Mübâya‘a. Mahmiye-i İstanbul’da Sultan Bâyezid mahallesi sâkinlerinden Mehmed b. Musa nâm kimesne asâleten ve mahalle-i mezbûre sâkinelerinden Emine Hatun bt. Hüseyin tarafından husûs-ı âti’l-beyânı ikrâra vekîl olup vekâleti nehc-i şer‘î üzere sâbite olan sadrî oğlu es-Seyyid Mehmed Çelebi b. es-Seyyid Hasan Çelebi meclis-i şer‘de vilâyet-i Anadolu’da Yalvaç sâkinlerinden işbu râfi‘u’l-kitâb Arab Süleyman b. Abdullah tarafından ikrâr-ı âti’l-beyânı tasdîke vekîl olan es-Seyyid Mustafa Efendi b. es-Seyyid Ahmed mahzarında her biri asâleten ve vekâleten ikrâr ve takrîr-i kelâm edip vilâyet-i mezbûrede Yalvaç mahallâtından Kaş mahallesinde vâki‘ olup iki tarafdan Mehmed Beşe mülkü ve bir tarafdan Kemâl Çavuş mülkü ve bir tarafdan tarîk-i âm ile mahdûd gāib ani’l-meclis Mustafa nâm kimesne ile üçümüz iştirâk-ı seviy üzere mutasarrıf olduğu harâba müşrife olmuş iken mülk-i menzil arsasında olan sülüsân hissemizi müvekkil-i mezbûr Arab Süleyman için vekîl-i mezbûra bin fıddî râyic fi’l-vakt akçeye bey‘ ol dahi müvekkili için minvâl-i muharrer üzere iştirâ ve kabûl ettikden sonra semeni olan meblağ-ı mezbûr bin akçeyi vekîl-i mezbûr es-Seyyid Mustafa Efendi yedinden her birimiz beşer yüz akçe ahz u kabz edip zikrolunan menzil arsasında olan sülüsân hisseyi mahâllinde kabzına vekîl-i mezbûru taslît eyledik dediklerinde mukırrân-ı mezbûrânın asâleten ve vekâleten cârî olan ikrârlarını vekîl-i merkūm es-Seyyid Mustafa Efendi bi’l-vekâle tasdîk ve tahkīk etmeğin mâ hüve’l-vâki‘ bi’t-taleb ketb olundu. Fî-gurreti Ramazan sene 1073. Şuhûdü’l-hâl: es-Seyyid Sadi Çelebi b. es-Seyyid Nureddin, Mehmed Çelebi b. Mehmed, Mustafa b. Hasan, Osman Çelebi el-muhzır.