İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 333 Hüküm no: 323 Orijinal metin no: [40b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Abdullah’ın ölen kardeşi Osman Beşe için Halil Beşe b. Sefer’den alacak davasının reddedildiği Dergâh yeniçerilerinin yirmi sekiz yayabaşılarına mahsûs odanın odabaşısı iken bundan akdem vefât eden Osman Beşe’nin kız karındaşı ve hasran vârisesi olup mahmiye-i İstanbul’da Defterdâr Ahmed Çelebi mahallesinde sâkine Âişe bt. Abdullah nâm hatun meclis-i şer‘-i hatîrde işbu râfi‘u’l-kitâb Halil Beşe b. Sefer mahzarında üzerine da‘vâ ve takrîr-i kelâm edip karındaşım ve mûrisim müteveffâ-yı mezbûr Osman Beşe’nin mezbûr Halil zimmetinde altı bin akçe hesâbı üzere altmış guruş hakkı olup kable’l-ahz vefât etmeğin meblağ-ı mezbûr ırsen bana intikāl etmekle mezbûrdan taleb ederim suâl olunsun dedikde gıbbe’s-suâl mezbûr Halil Beşe cevâbında deyn-i mezkûru ikrâr lâkin bir sene mukaddem hayatında beş bin beş yüz akçesini kendi yedine ve beş yüz akçesini dahi emri ile gulâmı Ali’ye teslîm eyledim deyü def‘le mukābele edecek akībe’l-istintâk ve’l-inkâr mezbûr Halil Beşe’den def‘-i mezbûrunu mübeyyin beyyine taleb olundukda udûl-i ricâl-i Müslimînden olup oda-i mezbûrede aşcı olan Mustafa Beşe b. Abdullah ve Süleyman Beşe b. Abdullah nâm kimesneler li-ecli’ş-şehâde meclis-i şer‘a hâzırân olup fi’l-vâki‘ târih-i kitâbdan bir sene mukaddem meblağ-ı mezbûrdan müteveffâ-yı mezbûra hayatında bizim huzûrumuzda beş bin beş yüz akçe ve beş yüz akçesi dahi emri ile gulâmı Ali’ye teslîm eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyet-i şerâ’iti’’l-kabûl şehâdetleri makbûle olmağın bî-vech mu‘ârazadan men‘ birle mâ-vaka‘a bi’t-taleb ketb olundu. Fi’t-tâsi‘ aşer min-Recebi’l-ferd li-sene isnâ ve seb‘în ve elf. Şuhûdü’l-hâl: Şükrullah b. Mustafa, Abdi Çelebi b. Hüseyin, Mustafa b. Ahmed, Mehmed b. Ramazan, Rasûl b. Rıdvan.