İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 333 Hüküm no: 324 Orijinal metin no: [40b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdülkerim b. Ömer’in İbrahim b. Abdullah ile diğer dülbendci taifesine borcunu ödemesi tenbihi Mahmiye-i İstanbul’da Mahmud Paşa kurbünde sâkin dülbendci tâifesinden İbrahim b. Abdullah mahfil-i kazâda Abdülkerim b. Ömer nâm kimesne mahzarında üzerine da‘vâ ve takrîr-i kelâm edip mezbûr Abdülkerim’e târih-i kitâbdan on beş gün mukaddem her birimiz dörder esedî guruşa olmak üzere iki ferhâd hânı dülbend ve iki yüz akçeye bir nısf dülbend ve iki yüz yirmi beş akçeye bir kırmızı bogası cem‘an bin üç yüz seksen beş akçeye mezbûr Abdülkerim’e bey‘ u teslîm edip ol dahi iştirâ ve tesellüm ve kabûl ettikden sonra semeni olan meblağ-ı mezbûr bin üç yüz seksen beş akçeyi mezbûr Abdülkerim’den hâlâ taleb ederim suâl olunsun dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyin beyyine taleb olundukda mahmiye-i mezbûrede Cafer Ağa Hânı’nda sâkin Salih b. Ali ve Mustafa b. Mehmed nâm kimesneler li-ecli’ş-şehâde mahfil-i kazâya hâzırân olup istişhâd olunduklarında fi’l-vâki‘ müdde‘î-i mezbûr İbrahim mezkûr Abdülkerim’e târih-i mezbûrdan on gün mukaddem her biri dörder esedî guruşa olmak üzere iki ferhâd hânı? dülbend ve iki yüz akçeye bir nısf dülbend ve iki yüz yirmi beş akçeye kırmızı bogāsı ki cem‘an bin üç yüz seksen beş akçeye bey‘ u teslîm ol dahi vech-i muharrer üzere iştirâ ve tesellüm ve kabûl eyledi biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde şehâdetleri makbûle olmağın meblağ-ı mezbûr bin üç yüz seksen beş akçeyi müdde‘î-i mezbûr İbrahim’e edâ ve teslîme mezbûr Abdülkerim’e tenbîh birle mâ-vaka‘a bi’t-taleb ketb olundu. Fi’t-tâsi‘ ve’l-işrîn min-Şa‘bâni’l-mu‘azzam li-sene [10]73 Şuhûdü’l-hâl: es-Sâbıkūn