İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 334 Hüküm no: 325 Orijinal metin no: [40b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ergiri v. Yorgi’nin Terkos’daki bostanını Dimitri v. Yorgi’ye sattığı, tarlasının da tasarruf hakkını verdiği Mübâya‘a-i tarla ve bostan Vilâyet-i Rumeli’nde Gerbiniş kazâsına tâbi‘ Terkos nâm karyeden Ergiri v. Yorgi nâm zimmî meclis-i şer‘de işbu bâ‘isü’r-rakīm Dimitri v. Yani nâm zimmî muvâcehesinde ikrâr ve i‘tirâf edip mesfûr Dimitri’ye karye-i mezbûrede vâki‘ bir tarafı kendi âhar mülküme ve bir tarafı Karayazıcı mülküne ve bir tarafı Avradi veresesi mülklerine ve bir tarafı tarîk-i âmma müntehî mülk bostanımı târih-i kitâbdan yüz seksen gün tamamına değin iki bin akçeye bey‘ bi’l-vefâ tarîki üzere bey‘ ol dahi iştirâ ve kabûl eyledikden sonra yine karye-i mezbûrede vâki‘ bir tarafı Balohori tarlasına ve bir tarafı Oydo tarlasına ve bir tarafı Nikola tarlasına ve bir tarafı dereye müntehî bir kıt‘a tarlanın hakk-ı tasarrufunu ma‘rifet-i sahib-i arz ile mezbûr Dimitri’ye sekiz bin akçeye tefvîz bi’l-vefâ vechi üzere tefvîz edip ol dahi tefevvüz ve kabûl eyledikden sonra semen-i mezbûr iki [bin] akçe ve bedel-i merkūm sekiz bin akçe ki cem‘an on bin akçeyi mezbûr Dimitri yedinden bi’t-tamam ahz u kabz edip zikrolunan bostan ve tarlayı mahâllinde kabz ve tasarrufa mezbûr Dimitri’yi taslît eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’r-râbi‘ min-şehr-i Ramazani’l-mübârek li-sene isneyn ve seb‘în ve elf. Şuhûdü’l-hâl: Mehmed b. Hüseyin, Mustafa b. ( ), Rasûl b. Rıdvan, Abdi b. Hüseyin, Hasan b. Mustafa, Mehmed b. Ramazan, Veli b. Mahmud