İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 335 Hüküm no: 326 Orijinal metin no: [40b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Beşe b. Dilaver’in ortağı Hasan Beşe b. Mehmed’le alacak davasında sulh oldukları Sulh. Mahmiye-i İstanbul’da Şeyh Resmî mahallesinde sâkin İbrahim Beşe b. Dilaver nâm kimesne mahfil-i kazâda işbu bâ‘isü’l-kitâb Hasan Beşe b. Mehmed mahzarında ikrâr ve takrîr-i kelâm edip mezbûr Hasan Beşe ile nısfı benim ve nısf-ı âharı onun olmak üzere nakkāşlık hıdmetinde şerîkler olup i‘mâlimizden yirmi iki bin akçe tahsîl edip meblağ-ı mezbûrun on bir bin akçesi benim ve on bir bin akçesi mezbûr Hasan Beşe’nin iken hâlâ meblağ-ı mezbûrun cümlesini ahz u kabz etmekle ben dahi bundan akdem nısf hissemi mezbûr Hasan Beşe’den da‘vâ ve taleb eylediğimde ol dahi vech-i muharrer üzere benimle şerîk olduğunu ikrâr lâkin meblağ-ı mezbûru kabzını inkâr etmekle beynimizde münâza‘ât-ı kesîre vâki‘ olmuş idi el-hâletü hâzihî vesâtet-i muslihîn ile meblağ-ı mezbûr da‘vâsından mezbûr Hasan Beşe benimle bin akçe üzerine inşâ-yı akd-i sulh eyledikde ben dahi meblağ-ı mezbûru kabûl ve bedel-i sulh olan meblağ-ı mezbûru mezbûr Hasan Beşe yedinden tamamen ahz u kabz edip ziyâde on bin akçe da‘vâsından mezbûr Hasan Beşe’nin zimmetini ibrâ ve ıskāt eyledim dedikde mâ-vaka‘a bi’t-taleb ketb olundu. Fi’r-râbi‘ min-Ramazani’l-mübârek li-sene isnâ ve seb‘în ve elf. Şuhûdü’l-hâl: es-Sâbıkūn.