İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 336 Hüküm no: 328 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayasofya-i kebir yakınındaki Ali Efendi b. Hüseyin’in tasarrufuna geçen menzil ve zaviyenin tamirine izin verildiği Meremmete izin Mahmiye-i İstanbul’da Ayasofya-i kebîr kurbünde sâkin fahrü’l-ulemâ Ali Efendi b. Hüseyin meclis-i şer‘de takrîr-i kelâm edip mahalle-i merkūmede vâki‘ bir tarafı İvaz Efendi Vakfı ve bir tarafı Baba Nakkaş Vakfı ve bir tarafdan bakkāl dükkânı ve bir tarafdan tarîk-i âm ile mahdûd süknâsını merkūm Hüseyin Ağa’nın ulemâdan recül-i sâliha vakf ve şart eylediği menzil ile gallesi meşrûta olan zâviyenin berat-ı sultanî ve hüccet-i şer‘iye ile ber-mûceb-i şart-ı vâkıf sâkin ve mutasarrıf Celeb İbrahim fevt olup mahlûl olmağla kezâlik ber-minvâl-i muharrer bana tevcîh olunup tasarrufumda iken mürûr-ı eyyâm ile harâba müşrif olup kābil-i süknâ olmamakla taraf-ı şer‘den üzerine varılıp ba‘de’l-keşf meremmete muhtâc olduğu müşâhede olundukdan sonra ta‘mîr ve meremmet için savb-ı şer‘den izin taleb ederim dedikde savb-ı şer‘den mevlânâ Receb Efendi irsâl olunup ol dahi üzerine varıp ol menzilin evleri ve zâviye-i merkūme odaları ber-minvâl-i muharrer harâba müşrif olup kābil-i mesken olmadığını ve meremmete muhtâc olduğunu ba‘de’l-müşâhede tahrîr eyledikden sonra kıbel-i şer‘a gelip haber vermeğin kıbel-i şer‘den asl-ı menzil ile zâviye odalarını meremmet ve ta‘mîre merkūm Ali Efendi’ye izin verilip mâ-vaka‘a bi’t-taleb ketb olundu. Fî 8 min-Cemâziyelûlâ li-sene isnâ ve seb‘în ve elf. Şuhûdü’l-hâl: Zülfikar Efendi b. Ahmed, Sinan Beşe b. Abdullah, Mehmed Efendi b. Ahmed, Mustafa Efendi b. Ahmed el-imâm, Ahmed Efendi b. Abdülcelil, Süleyman b. Halil b. Hasan el-muhzır