İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 337 Hüküm no: 329 Orijinal metin no: [41a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Helvacı Mustafa b. Abdullah’ın talebi üzerine Hüseyin Çelebi b. Hasan’ın kapatılan lağımı açtırması tenbih olunduğu Keşf-i kâriz. Mahmiye-i İstanbul’da Üsküblü mahallesinde sâkin hâfızü’l-kitâb Helvâcı el-Hâc Mustafa b. Abdullah meclis-i şer‘de takrîr-i kelâm edip mahalle-i mezkûre kurbünde Mollahüsrev mahallesinde vâki‘ ma‘lûmü’l-hudûd icâre-i mu‘accele ve müeccele-i ma‘lûmeteyn ile odalar ahâlîsinden Musa b. Ali ve Ahmed b. Mehmed nâm kimesneler hâlâ sâkin olduğum menzil kenîfinin mecrâsı kadîmden Kiremidcizâde Seyyid Mehmed Çelebi’nin binâ ve vakf eylediği kârize ma‘rifet-i mütevellî ile mülhak olup mezbûrların odaları altından cereyân edegelmiş iken mezbûrlar mecrâsını sed ve men‘ eyleyip târih-i kitâb-ı şehrînin ikinci günü şer‘-i mutahhardan nâib-i keşfolan Mustafa Efendi ve hâssa mi‘mârlarından üstâd Ahmed Halîfe ve lağımcıbaşı ve sâir Müslimîn ile zikrolunan odalar üzerine varıp mârrü’z-zikr odaların hâlâ mütevellîsi kāimmakāmı gāib ani’l-meclis Mehmed Çelebi ve mezbûrân Musa ve Ahmed Beşe huzûrlarında akd-i meclis olundukda zikrolunan kârizin kadîmini sâlifü’l-beyân olan odaların altından cereyânını ben şuhûd-ı udûl ile isbât eylediğimde zikrolunan kârizin sed olunan mevzi‘ini açdırıp mecrâ-yı kadîmin icrâya taraf-ı şer‘den tenbîh ve yedime minvâl-i muharrer üzere hüccet-i şer‘iye dahi verilmeğin hâlâ zikrolunan kârizin mesdûd olan mahâllini hüccet-i keşf mûcebince açdırmak murâd eylediğimde sâlifü’z-zikr odalar ahâlîsinden Hüseyin Çelebi b. el-Hâc Hasan nâm kimesne mâni‘ olup taraf-ı şer‘den tekrar üzerine varılıp mezbûr Hüseyin Çelebi’den ve ahâlî-i mahalle-i mezbûreden suâl olunup takrîrleri tahrîr ve zikrolunan kârizin mesdûd olan mahâllini açdırmağa mezbûr Hüseyin Çelebi’ye dahi tenbîh olunmasını taleb ederim dedikde savb-ı şer‘den Mevlânâ Mustafa Efendi irsâl olunup ol dahi zeyl-i vesîkada mastûrü’l-esâmî olan Müslimîn ile mezbûr el-Hâc Mustafa’nın zikrolunan menziline varıp mezbûr Hüseyin Çelebi ve sâir zeyl-i rakīmde mastûrü’l-esâmî olan Müslimîn huzûrlarında akd-i meclis-i şer‘ eyleyip ahâlî-i mahalle-i mezbûrenin müsinn ve ihtiyârlarından Mesud Efendi b. Halil el-imâm ve Himmet Halîfe b. Mehmed el-kayyûm ve Dilaver Halîfe b. Abdullah el-müezzin ve Hüseyin Ağa b. Eyüp ve Cafer Ağa b. Halil ve Osman b. Abdullah ve Mehmed b. Mustafa ve Ahmed Beşe b. Maden ve Receb b. Şaban nâm kimesneler istihbâr eyledikde mezbûrûnun her biri meclis-i ma‘kūd-ı mezbûrda zikrolunan kârizin kadîmini ve sâlifü’z-zikr odaların altında cereyânını alâ-tarîkı’ş-şehâde ihbâr eylediklerinden sonra mezbûr Hüseyin Çelebi dahi istintâk olundukda cevâbında fi’l-hakīka zikrolunan kâriz kadîm olup mârrü’z-zikr odaların altından cereyân eylediği benim dahi ma‘lûmumdur deyü ikrâr dahi eyledikden sonra mevlânâ-yı mezbûr mârrü’z-zikr kârizin sed olunan mevzi‘ini açdırtmaya mezbûr Hüseyin Çelebi’ye tenbîh birle vâki‘ hâli mahâllinde tahrîr ba‘dehû ma‘an irsâl olunan Ahmed ile meclis-i şer‘a gelip inhâ ve takrîr etmeğin mâ-vaka‘a bi’t-taleb ketb olundu. Fi’l-yevmi’s-sâmin min-şehr-i Ramazani’l-mübârek li-sene isneyn ve seb‘în ve elf. Şuhûdü’l-hâl: Kalaycı Ali Çelebi b. ( ), Ahmed Çelebi b. ( ), el-Hâc Ahmed b. Mümin, Süleyman b. Abdullah, Yusuf b. Abdullah, es-Seyyid Rasûl b. Şükür, Karahüseyin b. Mahmud .