İstanbul Mahkemesi 10 Numaralı Sicil (H. 1072-1073 / M. 1661-1663) cilt: 51, sayfa: 338 Hüküm no: 330 Orijinal metin no: [41b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sâliha bt. Abdullah’ın menzilini Kenan Bey b. Abdullah’a sattığı Mübâya‘a. Dârü’l-hilâfeti’l-aliyye-i Kostantıniyyeti’l-mahmiyede Kasımağa mahallesinde sâkine kendi tarafından asîl ve vâlidesi Sâliha bt. Abdullah tarafından husûs-ı âti’z-zikre vekîl olup mezbûrenin zâtını ma‘rifet-i şer‘iye ile ârifân Seyyid Mehmed Çelebi b. Seyyid Cafer ve imâm İbrahim Efendi b. Mahmud şehâdetleri ile şer‘an vekâleti sâbite olan Ümmühani bt. Abdullah meclis-i şer‘-i hatîrde işbu bâ‘isü’l-vesîka Kenan Bey b. Abdullah mahzarında asâletden ve vekâleten ikrâr ve i‘tirâf edip vâlidemiz mezbûre ile ale’l-iştirâki’s-seviy mülk ve hakkım olup mahalle-i mesfûrede vâki‘ etrâf-ı erba‘ası Kasım Ağa Vakfı ve Mustafa b. Ahmed mülkü ve Fahri Hatun menzili ve tarîk-i âmma müntehî bir bâb tahtânî oda ve bir sofa ve cüneyne ve kenîfi müştemil menzilimi cemî‘ tevâbi‘ ve levâhıkı ile asâleten ve vekâleten mezbûr Kenan Bey’e on iki bin akçeye bey‘ u teslîm ol dahi vech-i muharrer üzere iştirâ ve kabûl ve kabz ve tesellüm eyledikden sonra semeni olan meblağ-ı mezbûru asâleten ve vekâleten mezbûr Kenan Bey yedinden bi’t-tamam ahz u kabz eyledim ba‘de’l-yevm menzil-i mahdûd mezbûr Kenan Bey’in mülk-i müşterâsıdır mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fi’l-yevmi’s-sâlis ve’l-işrîn min-Şa‘bâni’l-mu‘azzam li-sene isnâ ve seb‘în ve elf. Şuhûdü’l-hâl: Seyyid Cafer Efendi b. ( ), Mehmed Efendi b. Abdullah, İsmail Çelebi b. ( ), Sahhâf Hüseyin Efendi b. ( ), Ali Çelebi b. ( ), Mustafa b. Mehmed.